Türkmen türgenleri Daşkentden Watanymyza dürli derejedäki medallaryň ýigrimi dokusyzy bilen gaýdyp geldiler. Şol ýerde wekilçilikli ýaryşlaryň birbada ikisi – sambo ýyldyzlarynyň arasynda dünýä çempionaty hem-de söweşjeň we sport sambosy boýunça Aziýanyň açyk birinjiligi geçirildi. Ýaryşlara 18 ýurduň wekilleri gatnaşdylar.
Sambo ýyldyzlarynyň arasyndaky dünýä birinjiliginde biziň toparymyz üç sany altyn, bir sany kümüş we üç sany bürünç medallary eýelediler. Zenanlaryň arasyndaky ýaryşda Z. Japbarowa (48 kilograma çenli), R.Uzakowa (60 kilograma çenli), G. Haýytbaýewa (64 kilograma çenli) altyn medallara mynasyp boldular. G. Babamyradowa (52 kilograma çenli) kümüş medaly eýeledi. Bürünç medala bolsa Z. Madraimowa (56 kilograma çenli) we erkek kişleriň arasyndaky bäsleşikde K. Allanurow ( 57 kilograma çenli) we A. Çakanow ( 82 kilograma çenli) mynasyp boldular .
Biziň toparymyz söweşjeň we sport sambosy boýunça Aziýanyň açyk çempionatynda has köp medaly (6 sany altyn, 3 sany kümüş we 13 sany bürünç medallary) eýelemegi başardy. Bäsleşikde ýeňijiler üç sany ýaş toparda – 17 ýaşa çenli bolan ýetginjekleriň we gyzlaryň, 19 ýaşa çenli ýigitleriň we gyzlaryň, şeýle hem erkek kişleriň we zenanlaryň arasynda kesgitlenildi.
Bu ýaryşda hem biziň samboçy gyzlarymyz has uly üstünlige mynasyp boldular. Olar 6 sany altyn, 3 sany kümüş we 4 sany bürünç medally eýelediler. Altyn medalla G. Babamyradowa ( 52 kilograma çenli), R. Uzakowa (60 kilograma çenli), J. Geldibaýewa (56 kilograma çenli), Wiolletta Şumilowa (60 kilograma çenli), M. Lohowa (65 kilograma çenli), G. Haýytbaýewa (64 kilograma çenli) mynasyp boldular.
Ýakyn wagtda türkmen samboçylary dünýä Kubogyna we dünýä çempionatlaryna taýýarlyk görüp başlarlar. Şol ýaryşlar şu ýyl degişlilikde Wladiowostokda, Litwada we Latwiýada geçiriler.
referans: www.turkmenistan.gov.tm