Türkmenistanyň Prezidenti Gurbanguly Berdimuhamedow “Oguzhan” köşkler toplumynda Aziýanyň Olimpiýa Geňeşiniň Ýerine ýetiriji komitetiniň 60-njy ýygnagyny geçirmek üçin indi ikinji gezek saýlanyp alnan türkmen paýtagtyna gelen Aziýanyň Olimpiýa Geňeşiniň Prezidenti, şeýh Ahmad Al-Fahad Al-Sabahy kabul etdi.
Myhman Aziýanyň Olimpiýa Geňeşiniň Ýerine ýetiriji komitetiniň maslahatyna gatnaşyjylaryň adyndan we hut öz adyndan hormatly Prezidentimiz Gurbanguly Berdimuhamedowa şunuň ýaly wekilçilikli ýygnagyň ýokary derejede geçirilmegine goldaw berendigi üçin tüýs ýürekden hoşallyk bildirdi we döwlet Baştutanyny türkmen döwletiniň Garaşsyzlygynyň 20 ýyllygynyň baýramçylygy bilen gutlady. Kuweýtiň Türkmenistan bilen däp bolan dostlukly hyzmatdaşlygy mundan beýläk-de pugtalandyrylmagyna uly gyzyklanma bildirýändigini nygtap, belent mertebeli myhman hormatly Prezidentimize Kuweýt Döwletiniň Emiri şeýh Sabah Al Ahmad Al Jaber Al Sabahyň salamyny we öz ýurduna sapar bilen gelip görmäge iberen çakylygyny gowşurdy.
Hormatly Prezidentimiz Gurbanguly Berdimuhamedow hoşniýetli sözler we çakylyk üçin minnetdarlyk bildirip, şu ýyllarda ýola goýlan döwletara gatnaşyklarynyň ýokary derejesini kanagatlanma bilen belledi. Ol däbe öwrülen dostluk gatnaşyklaryna, özara hormat goýmaga we ynanyşmaga daýanýar. Ýokary wekilçilikli ýygnagyň Aşgabatda geçirilmegi Türkmenistanyň we AOG-nyň üstünlikli hem-de netijeli hyzmatdaşlygynyň subutnamasydyr, biziň ýurdumyzyň olimpiýa hereketiniň belent ynsanperwer ýörelgelerine ygrarlydygynyň nyşanydyr diýip bellemek bilen, milletiň Lideri türkmen döwletiniň syýasatynyň ileri tutulýan ugurlarynyň her bir raýatyň, öňi bilen bolsa milletiň saglygy, beden we ruhy kämilligi bolup durýandygyny aýtdy. Şu maksatlar bilen häzirki wagtda paýtagtymyzda hem-de ýurdumyzyň ähli künjeklerinde ýokary halkara ülňülerine laýyk gelýän iri sport toplumlarynyň gurluşygy alnyp barylýar.
Söhbetdeşligiň barşynda şeýh Ahmad Al-Fahad Al-Sabah türkmen döwletiniň Baştutanyny Aziýa Olimpiýa geňeşiniň, Aziýa oýunlarynyň guramaçylyk komitetiniň ýolbaşçylarynyň 70-den gowragynyň gatnaşmagynda geçirilen ýygnagyň netijeleri hakynda anyk maglumatlary berdi. Aşgabat duşuşygynyň ýokary guramaçylyk derejesini belläp, myhman türkmen halkynyň mynasyp durmuşyny üpjün etmäge gönükdirilen oňyn özgertmeleriň üstünlikli amala aşyrylýan ýeri bolan Türkmenistanyň bu gün dünýäniň köp ýurtlary üçin nusgadygyny nygtady. Bu barada aýtmak bilen, AOG-nyň ýolbaşçysy biziň ýurdumyzda alnyp barylýan özgertmeleriň gerimi bilen ýakyndan tanyşmaga mümkinçilik bolandygyny belläp, olaryň üstünlikli durmuşa geçirilişine haýran galandygyny aýratyn nygtady. Şunuň bilen baglylykda, myhman türkmen Lideri tarapyndan alnyp barylýan we ählumumy ykrarnama eýe bolan netijeli parahatçylyk we hoşniýetli goňşuçylyk syýasatynyň ýurduň tutuş dünýä bileleşiginiň belent ynamyna mynasyp bolmagyna getirendigini aýtdy.
Duşuşygyň çäklerinde hormatly Prezidentimiz Gurbanguly Berdimuhamedow we şeýh Ahmad Al-Fahad Al-Sabah netijeli hyzmatdaşlygy mundan beýläk-de pugtalandyrmak üçin uly mümkinçiligiň bardygyny tassyklamak bilen, Türkmenistanyň we Aziýanyň Olimpiýa Geňeşiniň arasynda ikitaraplaýyn hyzmatdaşlygyň geljegine degişli meseleleriň giň toplumy boýunça pikir alyşdylar. 2017-nji ýylda Aşgabatda boljak V ýapyk binalarda we söweş sungatlar boýunça Aziýa oýunlary söhbetdeşligiň aýratyn ugruna öwrüldi. Döwlet Baştutanymyz degişli işleriň häzirden başlanandygyny nygtap, Türkmenistanyň öz tarapyndan öňde boljak Aziada -2017-nji mynasyp geçirmek üçin hemme tagallalary etjekdigini aýtdy.
Duşuşygyň ahyrynda Türkmenistanyň Baştutany we belent mertebeli myhman halkara olimpiýa sport hereketiniň umumy maksatlaryna laýyk gelýän netijeli özara gatnaşyklaryň üstünlikli ösdüriljekdigine ynam bildirdiler.
referans: www.turkmenistan.gov.tm