Türkmenistanyñ Garaşsyzlygynyñ we Türkiýe bilen Türkmenistanyñ arasynda diplomatik gatnaşyklaryñ ýola goýulmagynyñ 20 ýyllygy mynasibetli Türkiýä gelen Türkmenistanyñ Prezidenti Gurbanguly Berdimuhamedow saparyny dowam etdirýär.
Gurbanguly Berdimuhamedow düýn Prezident Abdulla Gül tarapyndan “Çankaýa” köşgünde garşy alyndy.
Türkmenistanyñ Prezidenti Gurbanguly Berdimuhamdow bilen Türkiýe Respublikasynyñ Prezidenti Abdulla Gülüñ arasynda nobatdaky gepleşikler geçirildi.
Gepleşikleriñ gün tertibine türkmen-türk hyzmatdaşlygynyñ ileri tutulýan ugurlary we häzirki döwrüñ talaplary esasynda gatnaşyklary mundan beýläk-de ösdürmegiñ mümkinçilikleri girizildi.
Özara duşuşykdan soñ türkmen lideri Berdimuhamedowa Türkiýäniñ iñ uly nyşany bolan “Döwlet nyşany” gowşuryldy.
Gepleşikleriñ jemleri boýunça Türkmenistan bilen Türkiýe Respublikasynyñ arasyndaky netijeli hyzmatdaşlygy mundan beýläk-de ösdürmäge gönükdirlen iki taraplaýyn resminalar bukjasyna gol çekişildi.
Gol çekişilen resminalar bukjasy barada Prezident Abdulla Gül “gatnaşyklarymyzy strategik derejä çykarýarys” diýdi.
Türkmenistanyñ Prezidenti Gurbanguly Berdimuhamedow “Çankaýa” köşgünden soñ Premýer ministrlige geçdi.
Gurbanguly Berdimuhamedow Premýer ministr R. T. Erdoganyñ hormatyna beren günorta naharyna gatnaşdy.
Türkmenistanyñ Prezidenti Berdimuhamedow soñ bolsa Prezident Abdulla Gül bilen Dikmen jülgesinde “Türkmenistan” seýilgähiniñ we türkmeniñ milli şahyry we akyldary Magtymgulynyñ ýadigärliginiñ açylyş dabarasyna gatnaşdy.
Berdimuhamedow seýilgähiñ açylyş dabarasynda eden çykyşynda “Türkmenistan” seýilgähiniñ we Magtymguly ýadigärliginiñ açylmagyna hoşallyk bildirdi we iki ýurduñ arasyndaky medeni gatnaşyklaryñ has-da pugtalandyryljakdygyna ynanýandygyny aýtdy.
Türkmenistanyñ Prezidenti Türkiýäniñ Beýik Millet Mejlisine baryp gördi. Gurbanguly Berdimuhamedow TBMM-niñ başlygy Jemil Çiçek bilen duşuşdy.
Gurbanguly Berdimuhamedow soñ bolsa Mejlisiñ Baş Asambleýasynda halk deputatlaryna ýüzlenip çykyş etdi.
Türkmen lideri Berdimuhamedowyñ Mejlisiñ Baş Asambleýasyndaky çykyşyny Premýer ministr Ministr R. T. Erdogan bilen Jemhuriýet Halk partiýasynyñ başlygy Kemal Kylyçdarogly hem diñledi.
Berdimuhamdow Mejlisde eden çykyşynda iki ýurduñ arasyndaky söwda gatnaşyklarynyñ mukdarynyñ 2010-nj ýyl bilen deñeşdirilende 25 göterim ýokarlamak bilen 3 milliard 650 million dollara çenli baryp ýetendigini aýtdy.
İki ýurduñ arasyndaky ykdysady, syýasy we medeni gatnaşyklara uly ähmiýet berýändiklerini aýdan Berdimuhamedow gatnaşyklaryñ mundan beýläk-de ösdüriljekdigini belledi.
Prezident Abdulla Gül myhman kärdeşi Berdimuhamedowyñ hormatyna “Çankaýa” köşgünde agşam naharyny berdi.
Prezident Gül naharda eden çykyşynda “İki doganlyk ýurduñ arasyndaky dostluk we doganlyk gatnaşyklaryñ pajarlap ösmegi üçin tagalla edýäris” diýdi.
Türkmenistandaky türk işewür adamlaryna berilýän goldaw sebäpli minnetdarlygyny bildiren Prezident Abdulla Gül türk telekeçileriniñ maýa goýumlarynyñ ýokarlandyrylmagy üçin höweslendirjekdiklerini aýtdy.
Türkmenistanda 20 ýyldan bäri iş alyp barýan türkmen-türk mekdepleriniñ milli we ruhu taýdan kämil nesilleri ýetişdirmäge dowam etjekdigini nygtan Prezident Abdulla Gül “Şol mekdeplerde okaýan ýaşlarymyz doganlygymyzyñ esasy subutnamasydyr” diýdi.
Türkmenistanyñ Prezidenti Gurbanguly Berdimuhamedow “iki ýurduñ arasyndaky dostlukly gatnaşyklaryñ mundan beýläk-de pugtalandyryljakdygyna ynanýarys” diýdi