Resul Gylyjowyň ýolbaşçylyk edýän ýaşlar kamera orkestriniň ýerine ýetirmeginde „Bahar konsertinde“ ýaňlanan mukamlar diňleýjileri ýagşy arzuwlara maýyl etdi. Şol gün köpsanly tomaşaçylar bu döredijilik toparynyň ýerine ýetirýän saz eserlerini diňlemek üçin paýtagtymyzyň „Watan“ kinokonsert merkeziniň ajaýyp zalyna ýygnandylar.
J. Rossininiň „Sewiliýaly sertaraş“operasyna uwertýrasy sazandalaryň ýerine ýetirmeginde tolgundyryjy pursatlary döredip, ajaýyp duýgulary oýarýan ýakymlyja şemal ýaly öwüsdi. Soňra ýene-de şol operadan türkmen saz sungatynyň ýyldyzy, Türkmen milli konserwatoriýasynyň wokal boýunça mugallymy Aýna Seýitgulyýewanyň ýerine ýetirmeginde Rozinanyň kawatinasy ýaňlandy.
Opera sazyny söýüjiler Türkmenistanyň halk artisti Gurt Nazarowyň ajaýyp sesini unudan däldirler. Onuň ýerine ýetirmeginde J. Werdiniň „Rigoletto“ operasyndan gersogyň balladasy diňleýjilerde ýatdan çykmajak täsir galdyrdy. Şol konsertde şeýle hem R.Lowlandyň „Passakaliýasy,“ „Meniň mylaýym we näzik jandarym“ filmden Ýe. Dogyň walsy, A.Laryň „Granadasy“, J.Offenbahyň „“Kan-kany“, A. Haçaturýanyň „Gaýan“ baletinden „Hüwdi“ we beýleki köpsanly saz eserleri ýerine ýetirildi.
Bu saz toparynyň diňleýjileriň arasynda şeýle uly abyraýdan peýdalanýandygynyň sebäbini onuň konsert meýilnamasynyň baýlygy, ýaş ýerine ýetirijileriň we dirižýoryň ussatlygy, sungata jany-teni bilen berlenligi bilenem düşündirmek bolar.
Orkestr 2007-nji ýylda çykyş edip başlady we eýýäm onuň ilkinji konserti saz söýýänlerde we hünärmenlerde uly gyzyklanma döretdi. Ýurdyň saz durmuşynda özboluşly döredijilik toparynyň ýüze çykandygy mälim boldy. Şol wagtlar bu toparyň sazandarlary Türkmen milli konserwatoriýasynyň ýöriteleşdirilen sazçylyk mekdep-internatynyň uçurymy Resul Gylyjowyň yhlasy bilen, şol mekdebi tamamlan ýaşlardan düzüldi.
Häzirki wagtda orkestrde ýöriteleşdirilen sazçylyk mekdebiniň uçurymlaryndan başga-da türkmen milli konserwatoriýasynyň talyplary hem çykyş edýärler. Resulyň özi hem häzir konserwatoriýanyň 3-nji ýyl talybydyr. Mundan hem başga R.Gylyjow Döwlet simfoniki orkestriniň 2-nji dirižýorydyr.
Şu ýylyň oktýabr aýyndaÝaşlar kamera orkestriniň döredilmegine 5 ýyl dolýar. Özüniň ilkinji döredijilik ýubileýine gabatlap, orkestr ýörite konserti taýýarlaýar. Toparyň ýolbaşçysynyň aýtmagyna görä, bu konsert örän gyzykly bolar.
referans:www.turkmenistan.gov.tm