Gazagystanyň Almaty şäherinde tamamlanan ýaşlaryň arasynda grek-rim göreşi boýunça Aziýa çempionatynda türkmen türgeni K.Esenow kümüş medala mynasyp boldy. Halkara derejeli sport ussady, Türkmenistanyň sport we syýahatçylyk institutynyň ikinji ýyl talyby bu ýeňşi 84 kilograma çenli agram derejesinde çykyş edip gazandy. Ýaryşa biziň türgenimizden başga-da Koreýadan, Hytaýdan, Gazagystandan, Gyrgyzystandan, Täjigistandan, Eýrandan, Ýaponiýadan, Özbegistandan we Hindistandan gelen 9 türgen gatnaşdy.
K. Esenow üçin bu ýeňiş uly üstunlikdir. Sebäbi bu onuň Aziýa derejesindäki şeýle halkara ýaryşlarynda ilkinji gezek finala çykyşydyr.
– Bu ýaryş maňa gelejekde altyn medal ugrunda ynamly çykyş etmäge mümkinçilik döretdi – diýip, K. Esenow gürrüň berýär. – Häzirki ýeňiş – bu hormatly Prezidentimiz Gurbanguly Berdimuhamedowyň alyp barýan syýasatynyň netijesidir. Berkarar döwletimiziň bagtyýarlyk döwründe sporty ösdürmek ilkinji nobatdaky döwlet derejeli wezipeleriň hatarynda goýuldy. Ýaş türkmen türgenleri indi iň bir häzirki zaman sport toplumlarynda we sport mekdeplerinde türgenleşik geçmäge mümkinçilik aldylar. Şonuň üçinem biziň toparymyz halkara sport manežlerinde has-da ýokary netijeleri gazanmagy öz öňlerinde wezipe edip goýdular.
K. Esenow ilkinji sylagyny (bürünç medaly) 2010-njy ýylda sebitara derejesindäki bäsleşikde, ýetginjekleriň arasynda Hindistanda geçirilen Aziýanyň birinjiligi ugrundaky ýaryşlarda eýeledi. Ol soňky ýyl Indoneziýada ýaşlaryň arasynda geçirilen Aziýa çempionatynda hem bürünç medala mynasyp boldy.
Ýakyn wagtlarda biziň milli toparymyz şu ýyl ýaşlaryň arasynda grek-rim göreşi boýunça Hytaýda geçiriljek dünýä çempionatyna taýýarlyk görmäge girişer.
referans: www.turkmenistan.gov.tm