2008-nji we 2009-njy ýyllarda Russiýanyň çempiony, Russiýanyň şu ýylky Kubogynyň eýesi, Rubin futbol toparynyň baş türgenleşdirijisi Gurban Berdiýew futbol boýunça milli çempionatyň türgenleşdirijileri üçin maslahat geçirdi.
Gurban Berdiýewiň belleýşi ýaly, onuň Aşgabada gelmeginiň baş maksady öz ýolbaşçylyk edýän toparynyň esasy düzüminden başlap, çagalar toparlarynyň oýunçylary bilen geçirýän iş tejribesi barada gürrüň bermekden ybaratdyr. Bu toparyň ýanynda alty ýaşdan başlap ýaş oglanlaryň bäş ýüz sanysyna futbol oýnunyň inçe syrlary öwredilýän internat işleýär.
Rubin toparynyň gazanýan üstünlikleri biziň ildeşimiz bilen bagly bolmagy guwandyryjy ýagdaýdyr. Tejribeli tälimçi ýygnananlara futbol toparynyň gurluşy, futbol işiniň guralyşy barada gürrüň berdi hem-de futbol oýunçylarynyň ussatlygyny ýokarlandyrmagyň syrlary barada gürrüňdeş boldy. Bu futbol toparynyň düzüminde biziň ildeşimiz Oraz Sähedow oýnaýar. Bu meşhur futbol toparynyň hünärmenleri Türkmenistanda futbol oýnunyň ösdürilişi bilen içgin gyzyklanýarlar.
referans: www.turkmenistan.gov.tm