Gazagystanyň paýtagtynda guşakly göreşmek boýunça dünýä çempionaty badalga aldy. Oňa türkmen türgenleri hem gatnaşýarlar. Bäsleşikleriň eýýäm birinji gününde biziň türgenlerimiz erkin ýagdaýda göreşmek boýunça medallaryň dördüsine—bir altyn medala we üç bürünç medala mynasyp boldular.
Balkan welaýatynyň Bereket etrabyndan Ýagşymyrat Annaýew birinji orna mynasyp boldy. Türkmenistanyň Milli sport we syýahatçylyk institutynyň bäşinji ýyl talyby 62 kilograma çenli agram derejesinde altyn medala mynasyp boldy.
Şol institutyň üçünji ýyl talyby, Balkan welaýatynyň Serdar etrabyndan Kerim Rejebow 90 kilograma çenli agram derejesinde bürünç medala mynasyp boldy. Onuň bilen bile okaýan, Lebap welaýatynyň Garabekewül etrabyndan Myrat Jumaýew bolsa 100 kilogramdan ýokary bolan agram derejesinde üçünji orny eýeledi. Ahal welaýatynyň Tejen etrabynyň sport mekdebiniň tälimçisi Annamyrat Çaryýew hem bürünç medala mynasyp boldy.
29-njy sentýabrda guşakly göreşmek boýunça dünýä çempionaty göreşiň nusgawy görnüşinde dowam eder. Onda biziň toparymyz 8 türgenden ybarat düzümde çykyş eder.
Erkekleriň arasynda geçirilýän bu dünýä çempionatynyň yzysüre 30-31-nji sentýabrda Astanada ýetginjekleriň arasynda guşakly göreşmek boýunça Aziýa çempionaty geçiriler. Bu bäsleşiklere hem häzirki wagtda Gazagystanyň paýtagtynda türgenleşik geçýän türkmen pälwanlary gatnaşarlar.
referans: www.turkmenistan.gov.tm