Türkmen türgenleri Russiýanyň Medyn şäherinde tamamlanan dünýä çempionatlarynyň ikisinde dört sany medala mynasyp boldular.
Milli sport we syýahatçylyk institutynyň talyby Serdar Hojamuhammedow (85 kilograma çenli agramda) köpugurly söweş boýunça dünýä birinjiliginde altyn medaly eýeledi. Sportuň bu görnüşiniň maksatnamasyna çylşyrymly päsgelçiliklerden geçmek we dzýudonyň, sambonyň, boksuň we kikboksingiň emellerini ulanyp, iki döwde söweşmek girýär. Ýaryşa 38 ýurtdan 170-den gowrak türgen gatnaşdy. Şeýle jogapkärli ýaryşa ilkinji gezek gatnaşýan biziň ildeşimiz özüni iň gowy tarapdan görkezdi we hormat münberiniň iň ýokary basgançagyna çykmagy başardy. Ýaryşyň deslapky tapgyrynda türkmenistanly türgeniň Ukrainanyň we Azerbaýjanyň wekillerinden üstün çykandygy, finalda bolsa russiýaly bäsdeşini ýeňendigi bellärliklidir.
Şol bir wagtyň özünde geçirilen beýleki bir dünýä çempionatynda sportuň pyçak zyňmak görnüşi boýunça ýaryşda maryly Jawad Açylow tapawutlandy. Bu ýaryşa alty ýurduň, şol çanda Russiýanyň, Belarusyň, Ukrainanyň we beýlekileriň wekilleri gatnaşdylar. Biziň ildeşimiz iki maşkda pyçagy 7 we 9 metr aralykdan zyňmakda kümüş medallara mynasyp boldy, absolýut birinjilikde bolsa iň gowy netijäni görkezip, altyn medaly eýelemegi başardy. Bu görnüşde pyçagy 5, 7 we 9 metr aralykdan zyňmakda toplanan utuklaryň jemi boýunça ýeňiji kesgitlenildi.
Aziýanyň häzirki rekordsmeni J.Açylow öň yklymyň çempionatlarynda birnäçe gezek ýeňiji bolupdy, dünýä ýaryşlarynda baýrakly orunlary eýeläpdi. Ine, indi bolsa biziň ildeşimiz dünýäniň absolýut çempiony boldy!
Munuň özi berkarar döwletimiziň bagtyýarlyk döwründe hormatly Prezidentimiz Gurbanguly Berdimuhamedowyň sporty ösdürmäge ägirt uly üns berýändigi netijesinde ýurdumyzyň sportunyň täze belentliklere galýandygynyň ýene-de bir aýdyň subutnamasydyr.
Ýeňişleriňiziň höwri köp bolsun, türkmen türgenleri!