Paýtagtymyzyň Gökje ýaşaýyş jaý toplumynyň stadionynda 2002-nji ýylda doglan ýetginjekleriň arasynda milli birinjiligiň final oýny geçirildi. Onda “Lebap” futbol kluby çempion adyna mynasyp boldy. Gündogar welaýatyň türgenleri ýurdumyzyň sebitlerine we Aşgabat şäherine wekilçilik edýän ýedi toparyň arasyndan saýlanmagy başardy.
Bijä görä “A” toparda Türkmenbaşy şäheriniň “Şagadam 2”, Ýaş olimpiýaçylar çagalar-ýetginjekler sport mekdebiniň “ÝaOÇÝeSM”, Futbol sport mekdebiniň “FSM” we Ahal welaýatynyň “Ahal”, “B” toparda Lebap welaýatynyň “Lebap”, “Olimp” orta sport mekdebiniň “Olimp” we Balkan welaýatynyň “Balkan” toparlary çykyş etdiler.
Toparlardaky tapgyrlaryň netijesi boýunça ýurdumyzyň ýetginjekler toparlaryndan güýçlüleriň dördüsi belli boldy, olar –“FSM”, “ÝaOÇÝeSM”, “Lebap” we “Balkan” toparlarydy. Sport mekdepleriniň wekillerinden üstün çykan gündogar we günbatar sebitleriň futbolçylary finalda çempionlyk ugrunda bäsleşdiler.
Oýnuň esasy wagty 2:2 hasabynda deň tamamlandy, goşmaça wagtda lebaplylar bäsdeşlerinden üstün çykdylar. 3-nji orun ugrundaky oýunda “FSM” 11 metrlik jerime urgylary boýunça “ÝaOÇÝeSM” toparyny 5:4 hasabynda utdy.