“Awaza” milli syýahatçylyk zolagynda “Türkmenistanda biotehnologiýany ösdürmegiň ugurlary” atly halkara ylmy maslahaty bolup geçdi. Häzirki zaman ylmynyň ileri tutulýan ugurlarynyň birine bagyşlanan iri möçberli forumyň geçirilmegine Türkmenistanyň hormatly Prezidenti badalga berdi hem-de ol biotehnologiýa, bioinženeriýa, bioenergetika we bioinformatika ulgamlarda iň täze gazanylanlary öwrenmäge hem-de önümçilige ornaşdyrmaga, halkara ylmy-tehniki hyzmatdaşlygy ösdürmäge möhüm goşant goşmaga gönükdirilendir.
Giň halkara hyzmatdaşlygyň ýola goýulmagy, dünýäniň ylym we bilim merkezleri bilen ýygjam özara gatnaşyklar Türkmenistanyň ylym syýasatynyň üstünlikli durmuşa geçirilmeginiň wajyp we aýrylmaz şerti bolup durýar. Bu syýasat bolsa innowasion ösüşiň, dünýäniň ylmy pikirleriniň we ýokary tehnologiýalarynyň öňdebaryjy gazananlaryny işjeň ornaşdyrmak strategiýasydyr.
Türkmenistanyň Ylymlar akademiýasynyň Dermanlyk ösümlikler we Botanika instituty tarapyndan guralan şu halkara maslahatyna Ýewropadan, Aziýadan, Amerikadan we Afrikadan bolan 40 töweregi ýurtlaryň wekilleri gatnaşýarlar. Maslahata gatnaşyjylaryň hatarynda dünýä meşhur alymlar, dünýäniň akademiki ylmy merkezleriniň, öňdebaryjy ýokary okuw mekdepleriniň ýolbaşçylary we hünärmenleri, ABŞ-dan, Kanadadan, Fransiýadan, Germaniýadan, Niderlandlardan, Çehiýadan, Russiýadan, Ukrainadan, Koreýadan, Ýaponiýadan, Israýyldan, Pakistandan, Eýrandan, Birleşen Arap Emirliklerinden, Müsürden, Gazagystandan, Ermenistandan, Täjigistandan, Tunisden, Surinamdan, Bangladeşden we beýleki ýurtlardan ylmy – barlag enjamlaryny işläp taýýarlaýjylar hem boldular.
Türkmenistanyň Ylymlar akademiýasynyň alymlary we aspirantlary, ýurduň iri bilim merkezleriniň, şol sanda Magtymguly adyndaky Türkmen döwlet uniwersitetiniň, Türkmen oba hojalyk uniwersitetiniň, Döwlet lukmançylyk uniwersitetiniň we Saglygy goraýyş we derman senagaty ministrliginiň birnäçe edaralarynyň, Halkara nebit we gaz uniwersitetiniň we beýleki ýokary okuw mekdepleriniň mugallymlary we talyplary, şeýle hem Tebigaty goraýyş ministrliginiň, milli parlamentiň, jemgyýetçilik guramalarynyň, köpçülikleýin habar beriş serişdeleriniň wekilleri maslahatda wekilçilik etdiler.
Mälim bolşy ýaly, biotehnologiýa – munuň özi ösüşine özi bilen ysnyşykly baglanyşykly bolan beýleki ugurlar ýaly, hususan-da, nanotehnologiýa, “ýaşyl tehnologiýa”, tebigatdan peýdalanyş ugurlaryna bütin dünýäde örän düýpli üns berilýän ylymdyr.