Türkmenistanyň we HHR-iň arasynda wideoaragatnaşyk ulgamy arkaly DIM-ara geňeşmeler geçirildi
2020-nji ýylyň 11-nji iýunynda Türkmenistanyň we Hytaý Halk Respublikasynyň daşary syýasat edaralarynyň arasynda wideoaragatnaşyk ulgamy arkaly geňeşmeler geçirildi.
Türkmen wekiliýetine Türkmenistanyň Daşary işler ministriniň orunbasary W.Hajiýew ýolbaşçylyk etdi. Hytaý tarapyna Hytaý Halk Respublikasynyň Daşary işler ministriniň orunbasary Le Ýuýçen baştutanlyk etdi.
Işjeň ýagdaýda geçirilen gepleşikleriň dowamynda taraplar ikitaraplaýyn gatnaşyklaryň, şeýle hem halkara guramalaryň ugry boýunça hyzmatdaşlygyň giň göwrümli meselelerini ara alyp maslahatlaşdylar. Diplomatlar ýokary derejelerdäki duşuşyklary guramagyň we işjeňleşdirmegiň örän wajypdygyny hem belläp geçdiler.
Hususan-da, taraplar dünýäde ýüze çykan pandemiýa bilen bagly sebitleýin we halkara gün tertibiniň derwaýys meselelerine garadylar. Şunuň bilen baglylykda, Türkmenistanyň Prezidentiniň koronawirusyň planetar ölçegde ýaýramagy ýaly gaýragoýulmasyz wehimlere garşy göreşde ylmy diplomatiýanyň gurallarynyň netijeli ulanylmagy baradaky başlangyçlarynyň aýratyn ähmiýetliligi we öz wagtyndalygy bellenilip geçildi.
Şeýle hem diplomatlar gün tertibiniň ykdysady, söwda, nebit we gaz, telearagatnaşyk, saglygy goraýyş, ylym, bilim, medeniýet ýaly ulgamlary babatda hyzmatdaşlygyň ileri tutulýan ugurlaryny alamatlandyrdylar. Bu ugurlarda her ýurduň ägirt uly kuwwatyny dolulygyna amala aşyrmaga mümkinçilikleriniň bardygy bellenildi. Taraplar hyzmatdaşlyk boýunça türkmen-hytaý toparynyň nobatdaky mejlisiniň ýakyn geljekde geçirilmegi baradaky tagallalaryň işjeňleşdirilmegi dogrusynda ylalaşdylar.
Merkezi Aziýa ýurtlarynyň we Owganystanyň Daşary işler ministrleriniň orunbasarlarynyň duşuşygy geçirildi
2020-nji ýylyň 11-nji iýunynda BMG-niň Merkezi Aziýada Öňüni alyş diplomatiýasy boýunça Sebitleýin merkeziniň gatnaşmagynda Merkezi Aziýa ýurtlarynyň we Owganystanyň Daşary işler ministrleriniň orunbasarlarynyň duşuşygynyň nobatdaky tapgyry sanly wideoaragatnaşyk arkaly geçirildi.
Duşuşyga Gazagystan Respublikasyndan, Gyrgyz Respublikasyndan, Täjigistan Respublikasyndan, Türkmenistandan, Özbegistan Respublikasyndan we Owganystan Yslam Respublikasyndan ýokary derejeli diplomatlar, BMG-niň Baş Sekretarynyň Merkezi Aziýa boýunça Ýörite Wekili, BMG-niň Merkezi Aziýada Öňüni alyş diplomatiýasy boýunça Sebitleýin merkeziniň ýolbaşçysy N.German we Merkeziň wekilleri, BMG-niň Baş Sekretarynyň Syýasy meseleler, parahatçylyk gurujylyk meseleleri we parahatçylyk döredijilik amallary boýunça kömekçisi, Ilçi Miroslaw Ýença, ÝB-niň Merkezi Aziýa boýunça ýörite wekili, Ilçi Peter Buriýan, ÝHHG-niň Dawalaryň öňüniň alynmagy boýunça Merkeziniň Direktory, şeýle-de halkara bilermenleri gatnaşdylar. Türkmenistanyň wekiliýetine Daşary işler ministriniň orunbasary W.Hajiýew wekilçilik etdi.
Türkmen wekiliýetiniň ýolbaşçysynyň nygtaýşy ýaly, sebitleýin gepleşikleriň bu formaty sebit hem-de global derejedäki biziň bilelikdäki hereketlerimiziň gün tertibinde duran derwaýys meseleleriň ara alnyp maslahatlaşylmagy üçin özüni önjeýli we aýratyn netijeli meýdança hökmünde ykrar etdi. Sanly wideoaragatnaşyk arkaly geçirilýän şu günki duşuşyk örän ähmiýetli hem-de öz wagtynda bolup, ol çylşyrymly ýagdaýlar dogrusynda pikirleri we kesgitlemeleri alyşmaga, täze koronawirus ýokanjynyň pandemiýasy zerarly ýüze çykan çökgünligiň ýeňip geçilmegine gönükdirilen başlangyçlara giňişleýin seretmäge mümkinçilik berýär.
Şonuň ýaly-da diplomat Owganystandaky ýagdaýlaryň jogapkär hem-de işjeň owgan güýçleriniň ählisiniň gatnaşmagynda giň gerimli umumymilli gepleşikleriň esasynda diňe parahatçylykly, syýasy serişdeler arkaly kadalaşdyrylmagynyň mümkindigini aýratyn nygtady we halkara jemgyýetçiliginiň parahatçylyk döredijilik mümkinçilikleriniň, ilkinji nobatda Birleşen Milletler Guramasynyň howandarlygy astynda Owganystanda has işjeň hem-de giňişleýin ulanylmagynyň zerurlygyny-da belläp geçdi.
Duşuşygyň dowamynda şeýle-de çökgünligiň ýeňip geçilmegi boýunça ikitaraplaýyn we sebit derejesindäki milli başlangyçlara hem-de tekliplere, çökgünlikden soňraky döwür üçin hökümetleriň çaklamalaryna syn berildi, şonuň ýaly-da sebitleýin tagallalaryň goldanylmagynda BMG-niň, BMG-niň Merkezi Aziýada Öňüni alyş diplomatiýasy boýunça Sebitleýin merkeziniň we beýleki düzümleriň mümkingadar ähmiýetleri dogrusyndaky tekliplere-de seredilip geçildi.
Türkmenistanyň Daşary işler ministriniň BMG-niň Ösüş Maksatnamasynyň wekili bilen duşuşygy
2020-nji ýylyň 11-nji iýunynda Türkmenistanyň Daşary işler ministri Raşid Meredowyň BMG-niň Ösüş Maksatnamasynyň Administratorynyň orunbasary we BMG-niň ÖM-nyň Ýewropa we GDA ýurtlary boýunça Sebitleýin edarasynyň direktory Mirýana Spolýariç Egger bilen onlaýn duşuşygy geçirildi.
Duşuşygyň barşynda taraplar Türkmenistanyň Birleşen Milletler Guramasy we onuň ýöriteleşdirilen agentlikleri bilen uzakmöhletleýin hem-de netijeli hyzmatdaşlygyna ýokary baha berdiler. Taraplar BMG-niň Ösüş Maksatnamasynyň Türkmenistandaky Ýurt boýunça wekilhanasynyň netijeli işini aýratyn belläp geçdiler.
Pandemiýa ýagdaýynyň global we sebitleýin netijeleri hem-de olaryň aradan aýrylmagy boýunça bilelikde durmuşa geçirilýän hereketler jikme-jik ara alnyp maslahatlaşyldy. Koronawirusyň ýaýramagy ýaly global wehimlere garşy göreşmekde syýasy-diplomatik gurallaryň ulanylmagy dogrusyndaky Türkmenistanyň Prezidenti Gurbanguly Berdimuhamedowyň başlangyjy hem aýratyn nygtalyp geçildi.
Ýurdumyzda Türkmenistanyň ýiti ýokanç kesele garşy taýýarlygyny we dessin çäreleriň görülmegini üpjün etmegiň meýilnamasynyň kabul edilendigi hem-de onuň BMG bilen hyzmatdaşlykda işlenilip düzülendigi bellenildi. BMG-niň Ösüş Maksatnamasy bilen hyzmatdaşlygyň degişli Meýilnamasynyň işlenilip düzülmegi bilen birlikde pandemiýanyň durmuş-ykdysady täsirleriniň azaldylmagy maksady bilen özarahereket etmegiň zerurlygy aýratyn nygtaldy.
Şonuň ýaly-da Durnukly ösüş maksatlarynyň durmuşa geçirilmegi boýunça bilelikdäki çäreler hem-de taslamalar hem ara alnyp maslahatlaşyldy we olar öz nobatynda ýurdumyzy 2019-2025-nji ýyllarda durmuş-ykdysady taýdan ösdürmegiň maksatnamasynda hem öz beýanyny tapýandyr.
Taraplar Türkmenistanyň BMG-niň Ösüş Maksatnamasy bilen geljekki hyzmatdaşlygyna degişli birnäçe meselelere seredip geçmek bilen, saglygy goraýyş hem-de daşky gurşawyň goragy ulgamyndaky özarahereketleriň netijeliligini aýratyn belläp geçdiler. Şonuň ýaly-da BMG-niň Ösüş Maksatnamasynyň Türkmenistan babatynda 2021-2025 ýyllar üçin Ýurt boýunça maksatnamasynyň işlenilip düzülmegi boýunça pikirler hem alyşyldy. DIM