Sagdynlyk we bagtyýarlyk ady bilen geçirilýän köpçülikleýin bedenterbiýe-sport we medeni-sagaldyş çäreleriniň dördünji güni köp sanly bäsleşiklere beslendi. Düýn sport baýramçylygynyň çäklerinde geçirilen sport baýramçylygyna figuralaýyn typmak boýunça birnäçe gezek Olimpiýa çempiony Irina Rodnina gatnaşdy.
Russiýaly ussat paýtagtymyzdaky Aşgabat-Aziada-2017-niň paýtagty ady bilen geçirilen halkara sergisine baryp göridi we sportuň gyşky görnüşleri boýunça toplumdaky buzly köşkde görkezme çykyşyny ýerine etirdi. Şöhrat gazanan bu türgeniň biziň paýtagtmyza indi dördünji gezek gelýändigini bellemeli. Ol her gezek gelende figuralaýyn typmak boýunça türkmen mekdebiniň ösüş derejesiniň ýyl-ýyldan artýandygyny aýratyn belleýär.
Şeýle hem Irina Rodnina Russiýanyň paýtagtynda her ýylyň 12-nji aprelinde geçirilýän buz üstündäki tanslaryň halkara festiwalyna türkmen türgenleriniň gatnaşjakdygyny aýtdy. 30 ýyla golaý mundan ozal olimpiýa çempiony tarapyndan gurnalan bu festiwal ilkinji nobatda zehinli ýaş türgenleri ýüze çykarmaga gönükdirilendir. Figuralaýyn typmak boýunça türkmen topary bu abraýly ýaryşlarda çykyş etmegi meýilleşdirip, öz maksatnamasyny taýýarlady we şu gün sportuň gyşgy görnüşleri boýunça sport toplumynda çykyş etdi.
Aşgabadyň günorta künjesinde bolsa welosport boýunça Türkmenistanyň çempionatynyň üçünji tapgyry geçirildi. Oňa gatnaşan Aşgabadyň, Lebap we Daşoguz welaýatlarynyň ýygyndy toparlarynyň wekilleri 120 kilometr aralyk boýuna toparlaýyn ýaryşlara gatnaşdylar.
Ýaryşyň iki tapgyryndan soň Türkmen döwlet ulag we aragatnaşyk institutynyň birinji ýyl talyby Ş.Geldiýewa ýaryşyň tertipnamasynda öňdäki orna düşdi. Ol sary sport lybasynda welosipetçiler toparyna ýolbaşçylyk etdi. Ol şu gün ýeňijleriň birinji üçlügine düşüp bilmedik hem bolsa, 130 kilometr aralyga 7-nji aprelde geçiriljek toparlaýyn ýaryşda öňdäki orunda bäsleşige goşular.
120 kilometrlik aralyk boýunça geçirilen bäsleşikde aşgabatly Y.Öwezmyradow ýeňiji boldy. Ikinji we üçünji orunlara degişlilikde aşgabatly türgenler R.Amangeldiýew we W.Kutuzow mynasyp boldular.
6-njy aprelde welosiped boýunça Türkmenistanyň çempionaty 54 kilometrlik menzil boýunça toparlaryň bäsleşigi bilen dowam eder.
Paýtagtymyzdaky Galkynyş sport toplumy şu gün erkekleriň we aýal-gyzlaryň arasynda gylyşlaşmak boýunça Aşgabadyň çempionatynyň geçirilýän ýerine öwrüldi. Bäsleşigiň baş maksady şu ýylyň 27-30-njy aprel aralygynda Balkan welaýat merkezindäki täze häzirkizaman sport toplumynda geçriljek Türkmenistanyň çempionatyna ökde türgenleri seçip almakdan ybaratdyr.
Türgenler medal ugrundaky ýaryşlarda iki görnüş boýunça bäsleşdiler. Onuň birinjisinde aýal-gyzlaryň arasynda altyn medala A.Mälikowa mynasyp boldy. Kümüş medaly A.Kiçiýewa eýeledi. Ýaryşyň üçünji ornuna türgenleriň ikisi E.Sahybowa we M.Hemraýewa düşdüler.
Erkekleriň arasynda geçirilen bäsleşikde W.Woronin ýeňiş gazandy. Ol final oýunlarynda M.Esenowdan üstün çykdy. Bürünç medala A.Agaýew bilen N.Dawudow mynasyp boldular.
Gylyşlaşmagyň beýleki görnüşinde ekrekler we aýal-gyzlar bir toparda bäsleşdiler. Jemleýji bäsleşikde M.Esenow we K.Baýramsähedow degişlilikde birinji we ikinji orny eýelediler. Ýaryşyň bürünç medalyna A.Kiçiýewa bilen E.Sahybowa mynasyp boldular.
Türkmenistanyň Döwlet lukmançylyk uniwersitetiniň sport toplumynda şu günler Aşgabadyň saglygy goraýyş düzümleriniň işgärleriniň arasynda woleýbol boýunça bäsleşikler ýaýbaňlandyryldy. Oňa paýtagtymyzyň ähli lukmançylyk edaralarynyň, şol sanda dermanhana düzümleriniň toparlary gatnaşýarlar. Ýaryşlar 5-nji aprele çenli dowam eder.
Şeýle hem şol gün guşakly göreş boýunça ikinji milli turnire badalga berler. Paýtagtymyzdaky Ýaş olimpiýaçylary taýýarlaýyş mekdebinde türkmen göreşiniň ussatlary bäsleşerler. Lebap welaýatynyň merkezirndäki dördünji sport mekdebinde ýurdumyzyň iň ökde pälwanlary kesgitlener.