Türkmenistanyň Prezidentiniň Kubogy ugrundaky halkara futbol bäsleşiginde şu gün “B” toparynda ikinji tapgyryň oýunlary geçirildi. Oýunlar bassyr iki ýyldan bäri bu abraýly bäsleşige gatnaşyjylary kabul edýän Abadan şäheriniň täze stadionynda geçirildi.
Ilkinji bolup meýdana Täjigistanyň Tursunzade şäherinden “Regar-TadAZ” bilen Russiýanyň Çerepowes şäheriniň “Şeksna” toparynyň futbolçylary çykdylar. Toparlaryň ikisi hem şowsuz badalga aldylar: Täjigistanyň edi gezek çempiony Türkmenistanyň häzirki çempiony we onuň Kubogynyň eýesi Balkanabadyň “Nebitçisinden” 0:2 hasabynda utuldy. Russiýanyň ikinji diwizionynyň wekili bolsa hut şonuň ýaly hasap bilen Marynyň “Merwinden” utuldy.
Oýnuň birinji ýarymynda pökgi geçirilmedi, toparlar 0:0 hasabynda arakesmä çykdylar. Täjik futbolçylary oýnuň ikinji ýarymynda depgini güýçlendirdiler we 69-njy minutda çalşyga çykan P.Burhonow ilkinji pökgini geçirdi. “Regar-TadAZ” 1:0 hasabynda öňe çykdy. Bu hasap oýnuň ahyryna çenli üýtgemedi.
Beýleki oýunda türkmen toparlary “Nebitçi” bilen “Merw” 0:0 hasabynda geňme-deň oýnadylar we 4 oçkosy bilen “B” toparynda öňdeligini sakladylar. “Regar-TadAZ-yň” 3 oçkosy bar. Şol topardaky bäsleşige gatnaşyjylaryň üçüsiniň haýsylarynyň paýyna ýarym finala çykmak üçin iki ýollanmanyň düşjekdigi galan oýunlarda: “Regar-TadAZ” bilen “Merwiň” we “Şeksna” bilen “Nebitçiniň” duşuşyklarynda belli bolar.
24-nji fewralda “A” toparynda üçünji tapgyryň tamamlaýjy oýunlary geçiriler. 15.00-da “Olimpiýa” stadionynyň meýdanyna Eýranyň “Ogab Gonbad” topary bilen Ermenistanyň “Gandzasary” çykar, 18.00-da bolsa Russiýanyň “Anži” we Türkmenistanyň “Altyn asyr” toparlary duşuşarlar. “Gandzasaryň” eýýäm geçen duşuşyklarda 6 oçko toplap, ýarym finalda özüne orun alandygyny ýatladýarys. Ýarym finalyň beýleki ýollanmasyna 3 oçkosy bolan “Altyn asyr”bilen hersiniň 1 oçkosy bolan “Anži” we “Ogab Gonbad” dalaşgärlerik edýärler.
referans: www.turkmenistan.gov.tm