Ýurdumyzda oba hojalygyny düýpli özgertmek boýunça kabul edilen çözgütleri üstünlikli durmuşa geçirmek, oba hojalyk we azyk önümleriniň öndürilýän möçberlerini mundan beýläk-de artdyrmak hem-de daýhanlarymyzy şalynyň ýokary hasylyny öndürmäge höweslendirmek maksady bilen, Türkmenistanyň Prezidenti Karara gol çekdi. Resminama laýyklykda Türkmenistanyň Oba hojalyk ministrligine, Galla önümleri baradaky “Türkmengallaönümleri” assosiasiýasyna, Daşoguz we Lebap welaýatlarynyň Oba hojalyk paýdarlar jemgyýetlerine Daşoguz welaýatynyň Saparmyrat Türkmenbaşy etrabynyň hem-de Lebap welaýatynyň Galkynyş, Farap, Serdarabat, Saýat we Garabekewül etraplarynyň daýhan birleşiklerinde önümçiligi we ekin dolanyşygyny agrotehnikanyň talaplaryna laýyklykda ylmy esasda ýola goýmak bilen, şalynyň ýokary hasylynyň öndürilmegini üpjün etmek tabşyryldy.
Ýurdumyzyň ykdysadyýetiniň pudaklaryny ýokary derejeli hünärmenler bilen üpjün etmek, Türkmenistanyň daşary ýurtlarda okan raýatlaryny alan hünärlerine laýyklykda işe ýerleşdirmek, daşary ýurt döwletlerinde berlen bilim hakyndaky resminamalaryň ýurdumyzda ykrar edilmeginiň düzgünlerini tertipleşdirmek maksady bilen, Türkmenistanyň Prezidenti Karara gol çekdi. Resminama bilen Türkmenistanyň raýatlaryna daşary döwletlerinde berlen ýokary we orta hünär bilimi hakyndaky resminamalary ykrar etmegiň Tertibi tassyklanyldy.
Ýaşululary döwletimiziň jemgyýetçilik durmuşyna işjeň çekmek, halkymyzyň jebisligini we agzybirligini has-da pugtalandyrmakda, döwlet ähmiýetli meseleleri parasatlylyk bilen maslahatlaşyp çözmekde olaryň baý zähmet we durmuş tejribesini peýdalanmak, Türkmenistanyň Ýaşulularynyň maslahatlaryny guramaçylykly geçirmek we olara gelýän teklipleri, ýüztutmalary toplamak, seljermek maksady bilen, Türkmenistanyň Prezidenti Karara gol çekdi. Resminama bilen Türkmenistanyň Ýaşulularynyň maslahaty hakyndaky Düzgünnama tassyklanyldy. Şeýle hem Karara laýyklykda Türkmenistanyň Ýaşulularynyň maslahatynyň edarasy döredilip, onuň düzümi we işgär sany tassyklanyldy.
Täze Galkynyş we beýik özgertmeler zamanasynda milli medeniýetimizi mundan beýläk-de ösdürmek, muzeýleriň işini talaba laýyk guramak hem-de Türkmenistanyň Baş milli muzeýiniň işini has-da kämilleşdirmek maksady bilen, Türkmenistanyň Prezidenti Karara gol çekdi. Resminama laýyklykda Türkmenistanyň Merkezi bankynyň Türkmenistanyň Milli gymmatlyklar muzeýiniň edara görnüşli tarap hökmünde işini bes etmek we onuň ähli gymmatlyklaryny we emläklerini Türkmenistanyň Baş milli muzeýiniň hasabyna bellenenen tertipde tölegsiz bermek bellenildi. Türkmenistanyň Medeniýet we teleradioýaýlymlar ministrligine Türkmenistanyň Baş milli muzeýiniň “Galkynyş muzeýi”, “Bitaraplyk muzeýi” we “Garaşsyzlyk muzeýi” şahamçalaryny bellenen tertipde döretmäge ygtyýar berildi hem-de olary degişlilikde Türkmenistanyň Konstitusiýasynyň, Türkmenistanyň Bitaraplyk we Türkmenistanyň Garaşsyzlyk binalarynda ýerleşdirmek tabşyryldy. Karar bilen, şeýle hem Türkmenistanyň Baş milli muzeýi hakyndaky Düzgünnama tassyklanyldy.
Täze Galkynyş we beýik özgertmeler zamanasynda ýurdumyzda ykdysadyýetiň durnukly we sazlaşykly ösüşini üpjün etmek, zähmete hak tölemegi hem-de zähmet gatnaşyklaryny düzgünleşdirmek, edaralaryň, kärhanalaryň we guramalaryň wezipe sanawyny tassyklamagyň we ylalaşmagyň tertibini has-da kämilleşdirmek maksady bilen, Türkmenistanyň Prezidenti Karara gol çekdi. Resminama bilen Türkmenistanda edara-kärhanalaryň wezipe sanawlaryny tassyklamagyň we ylylaşmagyň Tertibi tassyklanyldy.
referans: www.turkmenistan.gov.tm