Aşgabatdaky atçylyk sport toplumynda at çapyşygynyň ýazky möwsüminiň nobatdaky bäsleşikleri geçirildi. Onda ahalteke bedewleriniň 65-si öz aralarynda güýç synanyşdylar.
Şu ýylky möwsümde müň metr aralyga ilkinji gezek çykýan ikiýaşar bedewleriň bäsleşigi çapyşyklaryň başyny başlady. Erkin agramda çykyş edýän çapyksuwarlaryň erk eden bedewleriniň arasynda birinji we ikinji çapyşyklarda degişlilikde Dorgoňur (1 minut 09,0 sekunt) we Bezirgen (1 minut 09,0 sekunt) ýeňiji boldular.
Bäsleşigiň 3-5-nji çapyşyklarynda üçýaşar bedewler 1200 metr aralykda güýç synanyşdylar. Şonda Arslan atly bedew bu aralygy 1 minut 22,1 sekuntda geçip, ýeňiji boldy. Dördünji çapyşykda Amanbek (1 minut 22,5 sekunt) , bäşinji çapyşykda bolsa Şirwan (1 minut 23,3 sekunt) atly bedewler birinji gelmegi başardylar.
Üçünji topardan çykan üçýaşar bedewleriň 8-si 1400 metr aralykdan goşulanda bäsleşik has-da gyzykly boldy. Onda bu aralyga 1 minut 37,2 sekundy sarp eden Gözbaş ýeňiji boldy.
Ýedinji çapyşykda dört we ulyýaşar bedewleriň 8-si 2000 metr aralykda güýç synanyşdylar. Şonda bu ýaryşda Arafat atly bedew birinji geldi. Ol bu aralygy 2 minut 25,5 sekuntda geçmegi başardy.
referans: www.turkmenistan.gov.tm