2015-nji ýylyň 16-njy aprelinde Gazagystan Respublikasynyň Ylymlar Akademiýasynyň binasynda Almaty şäherinde Türkmenistanyň Bitaraplygynyň 20 ýyllygyna bagyşlanan Türkmenistanyň Bitaraplygy ýurduň daşary syýasatynyň esasydyr ady bilen Halkara ylmy-amaly maslahat geçirildi. Çäre Türkmenistanyň Gazagystan Respublikasyndaky Ilçihanasy tarapyndan Türkmenistanyň Ylymlar Akademiýasynyň we Gazagystan Respublikasynyň Milli Ylymlar Akademiýasynyň ýardam bermeginde guraldy.
Maslahat başlamazyndan öň oňa gatnaşyjylar ýörite açylan sergide Türkmenistanyň medeniýeti bilen tanyşmaga mümkinçilikler aldylar. Sergide 240-dan gowrak kitaplar, türkmen halylary we haly önümleri, türkmen suratkeşleriniň eserleri görkezildi, şeýle hem türkmen we gazak milli sazlary ýaňlandy.
Maslahatyň işine diplomatik korpusyň wekilleri, akademikler, alymlar, halkara guramalarynyň wekilleri, Gazagystan halkynyň Assambleýasynyň wekilleri, talyplar gatnaşdylar. Maslahat Türkmenistanyň Bitaraplygynyň taryhyna ösüşine bagyşlandy.
Çykyşlar we gutlag sözleri bilen Türkmenistanyň Ylymlar Akademiýasynyň prezidenti G.A.Mezilow we Gazagystan Respublikasynyň MYA-nyň prezidenti M.Ž.Žurinow, iki ýurduň akademikleri, alymlary we syýasaty öwrenijileri çykyş etdiler. Olar öz çykyşlarynda bitaraplygyň türkmen nusgasy we ýurduň bitaraplyk derejesiniň Merkezi Aziýa sebitinde parahatçylygyň we durnuklylygyň saklanylmagyna oňyn täsiri hakynda gürrüň berdiler, şeýle-de ýurduň bitaraplyk ýörelgelerine eýermeginiň 20 ýyllyk tejribesi görkezildi.
Maslahat türkmen we gazak köpçülikleýin habar beriş serişdeleri tarapyndan alnyp görkezildi. Maslahat tamamlanandan soňra Ilçihana tarapyndan günortanlyk nahary guraldy.