Türkmenistanyň Aragatnaşyk ministrliginiň Altyn asyr topary futbol boýunça Türkmenistanyň çempiony diýen ada eýe boldy.
Çempion diýen derejäniň ykbaly Ahal bilen Altyn asyryň duşuşygynda çözüldi. Oýnuň öňýanynda ýaryşyň sanawynda garşydaşlary 5 utuk tapawutlandyrýardy. Şoňa görä-de ahallylara duşuşykda ýeňmek zerurdy, aragatnaşykçylary bolsa deňlik kanagatlandyrýardy.
Duşuşygyň 38-nji minudynda emin gödekligi üçin Ahalyň düzüminden Ata Geldiýewi oýundan çykardy. Wagtyň köp bölegini azlykda oýnamak bilen ahallylar garşydaşyň goragyny böwüsmegi başarmadylar. Netijede Altyn asyr özüne zerur bolan 0:0 deňlik hasabyny saklady we öz taryhynda ilkinji gezek çempion derejäni almak bilen, 2015-nji ýylda Aziýanyň çempionlarynyň Ligasynda Türkmenistana wekilçilik etmäge hukuk gazandy. Türkmenistanyň Prezidentiniň Kubogynyň iki gezek eýesi bolan topary bu üstünlige ýurdumyzyň 37 ýaşly at gazanan tälimçisi Ýazguly Hojageldiýew getirdi.
Kümüş medal Türkmenistanyň Kubogynyň iki gezek eýesi Ahala nesip etdi. Şunuň bilen baglylykda, gutlaglary iki aý mundan ozal topara ýolbaşçylyk eden, ozal Türkmenistanyň milli ýygyndysynyň hüjümçisikä meşhur bolan 33 ýaşly Guwançmuhammet Öwekow kabul edýär.
Türkmenistanyň futbol federasiýasynyň kubogynyň eýesi Türkmenbaşynyň Şagadam topary milli futbol ýaryşynyň bürünç baýragynyň eýesi boldy. Deňizýaka futbolçylaryny bu üstünlige toparyň baş tälimçisi Amanmyrat Meredow getirdi.