Geljek ýylyň 18-27-nji ýanwar aralygynda Sankt-Peterburgda geçiriljek Arkalaşygyň Kubogyny almak ugrundaky däp bolan ýaryşlarda türkmen futbolçylary Ukrainanyň, Litwanyň we Moldowanyň ýygyndylary bilen duşuşar. Bije netijesinde bu komandalar “C” toparyna düşdüler.
Indi yzly-yzyna ikinji ýyl Arkalaşygyň Kubogyny almak ugrunda ýaşlar ýygyndylarynyň (21 ýaşa çenli) 12-si güýç synanyşar. Olar üç topara bölünýär. Beýleki iki toparyň düzümi şeýle: “A” toparda Belarusyň, Latwiýanyň, Estoniýanyň, Täjigistanyň; “B” toparda bolsa Gyrgyzystanyň, Gazagystanyň, Russiýanyň, Özbegistanyň ýygyndy toparlary çykyş eder.
Her topardan iň güýçli komandalaryň ikisi, şeýle hem üçünji orny eýelän komandalar öz aralarynda 1-8-nji orun ugrunda güýç synanyşarlar. Toparlarda dördünji orny eýelän komandalar we üçünji orny eýelän komandalaryň arasyndan iň pes netije görkezen komanda 9-12-nji ýerler ugrunda bäsleşer. Ähli oýunlar “Peterburg” sport-konsert toplumynyň emeli örtükli meýdançasynda geçiriler.
Türkmenistanyň ýygyndy topary ilkinji duşuşygyny 19-njy ýanwarda Moldowadan boloan bäsdeşleri bilen geçirer. Soňra bolsa biziň toparymyz litwaly futbolçylar bilen duşuşar. 22-nji ýanwarda türkmen türgenleri Ukrainanyň ýygyndy topary bilen duşuşyp, toparlaýyn oýunlary tamamlarlar.
Arkalaşygyň Kudogy ugrundaky ýaryşlara Türkmenistanyň toparyny ýurdumyzyň at gazanan tälimçisi Röwşen Muhadow taýýarlar. Onuň ýolbaşçylygynda türkmen futbolçylary Türkmenistanyň Prezidentiniň Kubogy ugrundaky halkara ýaryşynda ynamly ýeňiş gazandylar. Bu ýaryş biziň ýurdumyzyň 2012-njy ýylda Garaşsyz Döwletleriň Arkalaşygynda başlyklyk etmeginiň konsepsiýasyny amala aşyrmak boýunça çäreleriň çäklerinde GDA gatnaşýan ýurtlaryň ýygyndy toparlarynyň derejesinde Aşgabatda geçirildi.