Çeper gimnastika boýunça geçirilen Türkmenistanyň çempionatynda paýtagtly gyzlar ygtybarly ýeňiş gazanmagy başardylar. “Galkynyş” sport-sagaldyş toplumynda geçirilen ýaryşda 1998-2004-nji ýyllarda dogulan gyzlaryň otuzdan gowragy gatnaşdy.
Sport ussatlarynyň arasynda birinji orny 53,5 utuk gazanan Maýsa Rejepowa eýeledi. Uly toparda sport ussatlygyna dalaşgär Sähra Haitowa 39, 88 utuk bilen iň gowy netijäni görkezdi we kiçi toparda Dünýägözel Atanyýazowa 47,37 utuk bilen tapawutlanmagy başardy. Birinji derejelileriň arasynda Anna Waskowa 47, 89 utuk bilen ýeňiş gazandy. Ikinji derejeli ýaşlaryň arasynda 47,27 utuk bilen Nina Gorýunowa gowy netije görkezdi. Sport älemine ilkinji gadam basýan gimnastikaçylaryň arasynda 38,78 utuk bilen Aliýa Ýusubowa ýeňiş gazanmagy başardy.
Çempionlaryň ählisi Aşgabat şäheriniň sport komitetiniň ýanyndaky sport mekdebiniň tälimçileri Maral Nazarowa we Jemile Muradowadan tälim alýarlar. Türkmenistanyň çempionatynyň ýeňijileri medallara, hormat hatlaryna we gymmat bahaly sowgatlar bilen sylaglandylar.