Şu günler agyr atletika boýunça ýetginjekleriň arasynda Wenesuelede geçýän dünýä çempionatynda ildeşimiz D.Ismailow ştangany birbada götermekde 145 kilogram netije görkezip, bürünç medala mynasyp boldy. Milli sport we syýahatçylyk institutynyň talyby, Türkmenistanyň ýokary sport ussatlary mekdebiniň türgeni bu üstünlige 21 ýurtdan gelen 26 türgeniň arasynda 69 kilogram agyrlyk derejesinde gazandy.
Geljegine uly ynam bildirilýän D.Ismailow 2009-njy ýylda Daşkent şäherinde geçen ýetginjekleriň arasyndaky Aziýa çempionatynda 17 ýaşynda iki bürünç medaly eýelemegi başardy. Şu ýaryşlardan bir ýyl geçenden soň bolsa ol ýene-de iki bürünç medaly eýeledi. Geçen ýyl Malaýziýada geçen ýetginjekleriň arasyndaky dünýä çempionatynda D.Ismailow ştangany birbada götermekde kümüş, umumy netijede bolsa bürünç medala mynasyp boldy. Ine, indi bolsa ol dünýä çempionatynda ýene bir medaly eýeledi.
Wenesuelede geçýän ýetginjekleriň dünýä çempionatynda has agyrlyk derejesinde (105 kilogramdan ýokary) çykyş edýän türgenleriň arasynda geljegine umyt bildirilýän ýene bir türgenimiz – H.Toýçyýew hem medally orny eýelemäge dalaşgärlik eder.
Türkmen türgenleriniň sportda görkezýän netijeleriniň barha ýokarlanmagy biziň toparymyzyň dürli halkara ýaryşlarynda gazanýan medallary barada yzygiderli gelip gowuşýan hoş habarlar hormatly Prezidentimiziň ýurdumyzda köpçülikleýin bedenterbiýe-sagaldyş hereketini goldamak we ösdürmek, şeýle hem sportuň dürli görnüşleri boýunça ýokary derejeli ussatlaryň taýýarlanyrmagyny üpjün etmek baradaky syýasatynyň netijeli amala aşyrylýandygyna şaýatlyk edýär.
referans:www.turkmenistan.gov.tm