Türkmenistanyň futbol çempionatynyň Ýokary ligasynda 2020-nji ýyldaky möwsümiň ilkinji üç tapgyrynda göz öňünde tutulan 12 duşuşygyň 11-si geçirildi. 2-nji tapgyrdaky «Altyn asyr» ― «Ahal» duşuşygynyň soňa süýşürilendigini ozal habar beripdik.
Yzda galan duşuşyklarda jemi 11 futbolçy tapawutlanmagy başardy. Olar 11 duşuşykda derwezelere 14 pökgi geçirdiler.
Häzirlikçe, «Ahalyň» ýarym goragçysy Elman Tagaýew geçiren üç pökgüsi bilen möwsümiň iň netijeli futbolçysy bolmagy başardy. «Altyn Asyryň» ilkinji iki duşuşygynda hem tapawutlanan, ýöne «Merw» bilen bolan oýnuň 54-nji minudynda 11 metrlik jerime urgusyndan dürs peýdalanyp bilmedik Altymyrat Annadurdyýew bolsa iki pökgi bilen ikinji orny eýeleýär. Sanawda ady görkezilýän galan dokuz futbolçynyň ählisiniň hasabynda üç tapgyrdan soň ýekeje pökgi bar. Häzirlikçe, çempionatda iň soňky pökgini geçiren futbolçy «Altyn Asyryň» hüjümçisi Mihail Titowdyr.
Ýeri gelende aýtsak, 11 futbolçylyk sanawda «Ahalyň» üç (Elman Tagaýew, Murat Ýakşiýew, Yhlas Saparmämmedow), «Altyn Asyryň» (Altymyrat Annadurdyýew, Mihail Titow) we «Köpetdagyň» (Şiri Annaýew, Ýazgylyç Gurbanow) iki futbolçysy bar. Şeýle hem şu möwsümde «Merwden» Döwlet Baýramow, «Nebitçiden» Mämmedaly Karadanow, «Şagadamdan» Hemra Amanmämmedow, «Aşgabatdan» bolsa Sahupnazar Durdyýew tapawutlandy.
Agageldi ITALMAZOW, sport synçysy.
Çeşme: http://tff.com.tm/