Paýtagtymyzda ýetip gelýän Halkara zenanlar güni – 8-nji mart baýramçylygyna bagyşlanylan köpçülikleýin sport ýaryşlary geçirildi. Baýramçylyk ýaryşlary Türkmenistanyň Syýahatçylyk we sport baradaky döwlet komiteti tarapyndan bedenterbiýäni we sporty mundan beýläk-de ösdürmek maksady bilen guraldy.
Mälim bolşy ýaly Türkmenistanyň Prezidenti Gurbanguly Berdimuhamedow Ministrler Kabinetiniň ýakynda bolup geçen mejlisinde sagdyn durmuş ýörelgelerini jemgyýetde berkarar etmek, şol sanda ýurdumyzyň jemgyýetçilik guramalary bilen has giň gatnaşyklary saklamagyň hasabyna berkarar etmek boýunça işleri işjeňleşdirmegiň zerurdygyny belledi. Şu guramalaryň merkezi geňeşlikleri -Türkmenistanyň Demokratik partiýasy, Kärdeşler arkalaşyklarynyň Milli merkezi we ýaşlar guramalary geçirilýän häzirki köpçülikleýin ýaryşlara öz toparlarynyň gatnaşmagyny gazanmak bilen, ýurdumyzyň tennis býunça milli merkezi bilen bilelikde ýaryşlaryň ýeňijilerine baýrak gowşurmaklyga hem işeňňir gatnaşdylar.
Bu köpçülikleýin baýramçylyga jemgyýetçilik guramalarynyň wekilleri bilen bir hatarda, Dokma senagaty, Gurluşyk, Saglygy goraýyş we derman senagaty ministrlikleriniň toparlary hem gatnaşdylar. Bu ýaryşlar Türkmenistanyň döwlet syýasatynyň ugurlaryny açyp görkezýär, olar bolsa jemgyýeti ösdürmegiň esasy hökmünde sagdyn durmuş ýörelgelerini özünde jemleýär.
Berkarar döwletiň bagtyýarlyk döwri diýilip atlandyrylýan häzirki öňe gidişlikler we innowasiýalar döwri bu gün ösýän türkmen sportunyň taryhynda täze sahypany açdy. Köpçülikleýin bedenterbiýe-sagaldyş hereketleri bat alýar, ýurdumyzda dünýä ülňülerine gabat gelýän häzirki zaman türkmen sporty kemala gelýär. 2017-nji ýylda söweş sungaty boýunça ýapyk binalarda geçiriljek V Aziýa oýunlaryny Aşgabatda geçirmek barada Aziýa olimpiýa geňeşiniň karary hem biziň ýurdumyzda sport ulgamynda amala aşyrylýan özgertmeleriň halkara derejesinde ykrar edilýändigine şaýatlyk edýär.
Baýramçylygyň dabaraly açylyşy “Köpetdag” stadionynda boldy. Bu ýerde 60 metr aralyga ylgamak, uzynlygyna bökmek, 4х100 metr aralyga ylgamak we dartsu boýunça köpçülükleýin ýaryşlar geçirildi.
60 metr aralyga ylgamakda we uzynlygyna bökmekde Saglygy goraýyş we derman senagaty ministrliginiň toparyndan K. Bekmetowa birinjiligi eýeledi. Bu ministrligiň toparyna estafeta ýaryşynda-da taý tapylmady. Dartsu boýunça ýaryşlarda ýekelikde iň gowy netijäni “Bahar” tikin fabriginiň toparyndan H. Muhammedowa (222 utuk), toparlaýyn birinjilikde bolsa Gypjak şäherçesiniň jinsi fabriginiň topary (530 utuk) görkezdi.
Bu ýaryşlarda birbada 6 topary çykyş eden Dokma senagaty ministrliginiň topary ýörite hormat diplomy bilen sylaglandy.
“Köpetdag” stadionyndaky sport baýramçylygy Aşgabat şäheriniň umumybilim berýän mekdepleriniň toparlarynyň arasynda geçirilen köpçülikleýin ýeňil atletika ýaryşlary bilen tamamlandy. Bu ýaryşy ýaş nesliň arasynda sagdyn durmuş ýörelgesini wagyz etmek maksady bilen şäheriň “Türkmenistan” bedenterbiýe-sport ýaşlar guramasy gurady.
referans: www.turkmenistan.gov.tm