Şäher sport komitetiniň paýtagtymyzdaky küşt sport mekdebinde 8 ýaşa çenli çagalaryň hem-de 16 ýaşa çenli ýetginjekleriň we gyzlaryň arasynda küşt boýunça Türkmenistanyň birinjiligi ugrundaky iki ýaryşda ýeňijiler we baýraklara mynasyp bolanlar kesgitlenildi. Ýurdumyzyň çempionlary diýen at ugrunda ähli welaýatlaryň we Aşgabat şäheriniň sportuň bu görnüşiniň iň gowy ussatlary bäsleşdiler.
Sport baradaky döwlet komiteti we Milli küşt merkezi tarapyndan guralan ýaryş her bir göçümden soň 30 sekunt goşmak bilen bir tapgyra 1,5 sagat wagt bilen aýlawlaýyn ulgam boýunça geçirildi. Bu ulgam Halkara küşt federasiýasy tarapyndan birnäçe ýyl mundan öň girizildi we türgenlere berlen wagty özleriniň kesgitlemegine mümkinçilik berýär.
8 ýaşa çenli gyzlaryň toparynda ýurdumyzyň iki gezek çempiony Bägül Ezizowa nobatdaky gezek özüniň iň oňat küştçüdigini subut etdi. Aşgabadyň sport küşt mekdebinden Serdar Annaberdiýewden tälim alýan küştçi gyza 100 göterim netijäni görkezmek başartdy. Bägül 11 utuk toplap, ynamly ýeňiş gazandy.
Bägüliň ýedi ýaşa çenli ýaş toparynda dünýäniň çempiony diýen ada hem eýe bolup, mekdep okuwçylarynyň arasynda Gresiýada geçirilen dünýä çempionatynda altyn medala mynasyp bolandygyny ýatlap geçeliň. Şu ýylyň ýazynda bolsa ýene üç milli ýaryşlarda, 10, 12 we 14 ýaşa çenli küştçüleriň arasynda Türkmenistanyň birinjiligi ugrundaky ýaryşlarda sylaglar ugrunda göreşmek wezipesi onuň öňünde durýar. Ol birinji ýaş toparynda hem ýurdumyzyň häzirki çempionydyr.
8 ýaşly türkmen küştçi gyzlarynyň arasynda Lebap welaýatynyň toparyndan Leýla we Lola Şöhradowalar kümüş we bürünç medala mynasyp boldy. Olaryň hasabynda utuklaryň birmeňzeş sany, ýagny 9,5 utuk boldy. Bu babatda sport netijeliliginiň gatnaşygy aýgytly şert boldy, şonda Leýla öz uýasyndan öňe saýlandy.
8 ýaşa çenli ýaşdaky toparda oglanlaryň arasynda hem Amyderýanyň kenaryndan türgenler öňdäki orunlary eýelediler. Olar ýaryş sanawynda ilkinji iki basgançagy eýelediler. 14 utuk gazanan Mekan Jumagulyýew hormat sekisiniň ýokary basgançagyna çykdy, 12 utuk gazanan Mekan Rüstemow bolsa kümüş medala eýe boldy. Türgenleriň ikisi-de Güljahan Öwlýagulyýwanyň ýolbaşçylygynda sportuň bu görnüşi bilen meşgullanýarlar. Mary welaýatyndan Hezretaly Haşimow bürünç medala mynasyp boldy.
Saparmyrat Atabaýew öz hasabyna nobatdaky rekordy ýazdy, ol 16 ýaşa çenli toparda mümkin bolan 15 utukdan 15 utuk gazanyp ýeňiş gazandy. Bu onuň milli sport bäsleşiginde 17-nji ýeňşi boldy. 2012-nji ýylda Türkiýede geçirilen Bütindünýä küşt olimpidasynda ol özüniň esasy rekordyny we umuman alnanda, sport bäsleşiginde esasy üstünligini gazandy, şonda aşgabatly türgen 16 ýaşa çenli ýaş toparynda altyn medala mynasyp boldy. Ýetginjekleriň ýaş toparynda heniz hiç bir türkmen küştçüsi şunuň ýaly ýeňşi gazanmandy.
Indi Türkmenistanyň at gazanan tälimçileri Aýdogdy Atabaýewiň we Orazly Annageldiýewiň (halkara grossmeýsteri) ýolbaşçylygynda tälim alýan Saparmyrat 16 ýaşa çenli ýaşlaryň arasynda nobatdaky Bütindünýä küşt olimpidasyna taýýarlyk görýär, ol şu ýylyň güýzünde Gazagystanda geçiriler.
Türkmenistanyň birinjiligi ugrundaky ýaryşa gaýdyp gelmek bilen, kümüş medala mynasyp bolan Hajygurban Döwletowyň ýeňijiden iki utuk yza galandygyny we Farhan Kazymowyň üçünji orny eýeländigini belläp geçmeli.
16 ýaşa çenli ýaş toparyndaky gyzlaryň arasynda Aşgabat şäherinden Jemal Öwezdurdyýewa hormat sekisiniň ýokarky basgançagyna çykdy. Şanyýaz Annanyýazowdan tälim alýan küştçi 15 utukdan 14 utuk toplady. Ikinji orna Meňli Öwezowa we üçünji orna Annagül Abdyllaýewa mynasyp boldy.
Fewralyň soňky ongünlüginde küşt boýunça milli ýaryşlaryň medallary ugrundaky göreşe uly ýaşly toparlaryň wekilleri hem girişer.