Säher bilen sagdyn durmuş ýörelgesiniň tarapdary we köpçülikleýin bedenterbiýäniň, sportuň ösdürilmegi ugrunda işjeň tagalla edýän hormatly Prezidentimiz paýtagtymyzyň demirgazyk künjegindäki Türkmenistanyň Sport-ulag merkezine geldi.
Döwlet Baştutanymyz öňi bilen ýurdumyzda sagdyn durmuş ýörelgesiniň berkarar edilmegi, köpçülikleýin bedenterbiýäniň we sportuň ösdürilmegi, oňa tutuş ilatyň, esasan-da, ýaş nesilleriň işjeň çekilmegi ugrunda ähli zerur tagallalaryň edilmelidigini belledi. Ýurdumyzyň ähli künjeklerinde ulanmaga berlen we güýçli depginde gurulýan döwrebap sport desgalary, stadionlar, sport mekdepleri Türkmenistanda bedenterbiýäniň işjeň ýagdaýda ösdürilmegini we sporta höwesek ýaşlaryň sanynyň artmagyny şertlendirýär diýip, milli Liderimiz aýtdy.
Soňra sportuň dürli görnüşleri bilen meşgullanmakda halkymyza, esasan-da, ýaşlara nusgalyk görelde görkezýän hormatly Prezidentimiz bu ýerde welosipedli gezelenç etdi.
Berkarar döwletimiziň bagtyýarlyk döwründe halkymyzyň, ilkinji nobatda bolsa ýaş nesilleriň saglygynyň goraglylygyny üpjün etmegi döwlet ähmiýetli wezipe hökmünde yglan eden döwlet Baştutanymyz ýurdumyzda köpçülikleýin bedenterbiýe-sagaldyş hereketiniň we sportuň ýokary gazananlarynyň ösdürilmegine hem-de onuň maksada okgunly, uzakmöhletleýin umumymilli maksatnama esasynda işjeň häsiýete eýe bolmagyna aýratyn ähmiýet berýär. Bu babatda birnäçe anyk we yzygiderli çäreler durmuşa geçirildi. Ýurdumyzda umumymilli Oýunlaryň, sportuň durüli görnüşleri boýunça halkara ýaryşlarynyň geçirilmegi we sport ulgamynyň maddy-enjamlaýn binýadynyň yzygiderdi pugtalandyrylmagy munuň aýdyň subutnamasydyr. Soňra wise-premýerler häzirki zaman sport ulaglarynda Türkmenistanyň Sport-ulag merkeziniň ýörite ýaryşlar geçirmek üçin niýetlenen ýoly boýunça birnäçe öwrüm etdiler. Munuň özi ýurdumyzda milli Liderimiziň ýolbaşçylygynda köpçülikleýin bedenterbiýäniň, has takygy, sportuň ähli görnüşleriniň giň meşhurlyga eýe bolýandygynyň aýdyň subutnamasydyr.
Häzir türkmen awtoulag sportunyň öňünde uly mümkinçilikler açylýar. Şunda hem döwlet Baştutanymyz Gurbanguly Berdimuhamedowyň şahsy hyzmatlary ägirt uludyr. Soňky ýyllarda ýokary tizlikli awtoulaglaryň täze görnüşleriniň gelip gowuşmagy bu ugra höwesek ýaşlaryň sanynyň artmagyny awtomobil sporty bilen meşgullanýan türgenleriň we tälimçileriň ussatlygyny ýokarlandyrmagy üçin zerur şertler üpjün edilýär. Munuň özi biziň ýurdumyzyň awtomobil sporty boýunça halkara derejesinde guralýan ýaryşlaryň merkezine öwrülmegi üçin oňaýly şertleri döredýär.
Hormatly Prezidentimiziň egindeşleri sport ulagyndaky ýörişini tamamlanlarynda hormatly Prezidentimiziň özi hem sport ulagyna mündi.
Mälim bolşy ýaly, 2013-nji ýylyň sentýabrynda ýurdumyzyň taryhynda awtomobil sporty boýunça ilkinji desgalar toplumynyň açylyş dabarasy bolupdy. Oňa gatnaşmak üçin biziň ýurdumyza köp sanly daşary ýurtly myhmanlar Halkara awtomobil federasiýasynyň, iri awtomobil sporty kompaniýalarynyň ýolbaşçylary, beýleki awtosport guramalarynyň hem-de Halkara awtoulag bileleşiginiň wekilleri geldiler.
Şol gün hormatly Prezidentimiz 7 belgili “Alfa Romeo” sport ulagynda bu ýerde guralan ýaryşlara gatnaşyp, ýokary netije görkezdi. Şonda “Alfa Romeo” derejesindäki bäsleşikleriň ilkinjisine badalga berlipdi. Ýeri gelende aýtsak, şol pursatdan ýarym ýyl gowrak ozal hormatly Prezidentimiz Gurbanguly Berdimuhamedow Bütindünýä saglyk güni mynasybetli guralan bäsleşiklerde Wolkigar Drift sport awtoulagynda çykyş edip, ussatlyk görkezendigini bellemek ýerliklidir.
Ine, bu gün hem döwlet Baştutanymyz Türkmenistanyň Sport-ulag merkeziniň ýaryş ýolunda sport ulagynda ussatlyk bilen birnäçe öwrüm etdi.
Hormatly Prezidentimiz sport ulagynda aýlaw edip bolan soň, egindeşlerine ýüzlenip, bu ulaga erk etmegiň hem-de bu görnüş boýunça netije gazanmak üçin zerur bolan endikleriň aýratynlyklary barada gürrüň berdi. Sport ulagynda sürüjiniň özüni ykjam duýmagy, onuň amatly oturmagy esasy şert bolup durýar, şeýle hem ulagyň tehniki taýýarlygyny gözden geçirmek sportuň bu görnüşi boýunça ýokary netije gazanmagyň baş şertidir diýip, hormatly Prezidentimiz gürrüň berdi. Ýene bir aýratyn bellemeli zat, ol hem sport ulagynda bäsleşik geçirilende howanyň degişli derejede bolmagy sport mekreziniň ýollarynyň ýylylyk derejesiniň kadala laýyklygy ýaryşy guramagyň esasy mümkinçiliklerini üpjün edýär diýip, döwlet Baştutanymyz sözüni dowam etdi.
Milli Liderimiz meýdançanyň merkezinde duran “Wolkigar Drif” sport ulaglarynyň bezeg aýratynlyklaryna ünsi çekip, ulaglaryň bezeginde milli öwüşginiň, döwrebaplygyň hem-de gözegelüwliligiň öz beýanyny tapmalydygyny aýtdy. Türkmenistanyň awtomobil sporty ulgamyna degişli sport ulaglarynyň Berkarar döwletimiziň bagtyýarlyk döwrüniň ruhuna kybap derejede bolmagy häzirki döwrüň möhüm talabydygyny belledi.
Soňra hormatly Prezidentimiz welosipedli ýörişini dowam etdi. Şol pursatda döwlet Baştutanymyzyň egindeşleri hem welosipedde sport meýdançasyna çykdylar.
Ýurdumyzda sporty ösdürmekde anyk ädimler ädildi, şol sanda düzümi döwrebaplaşdyrmak, ýurdumyzda sportuň täze, şeýle hem däbe öwrülen görnüşlerini, şol sanda welosiped we awtoulag sportlaryny ösdürmek, ilat köpçüligini şol sportlar bilen meşgullanmaga çekmek babatda uly işler edildi.
Sportuň meşhur görnüşleriniň biriniň sazlaşykly ösdürilmegine, bar bolan düzümleriň döwrebaplaşdyrylmagyna, ilat köpçüliginiň welosiped sporty bilen köpçülikleýin meşgullanmagyna gönükdirilen “Türkmenistanda welosiped sportuny ösdürmegiň meseleleri hakyndaky” kararyň kabul edilmegi munuň aýdyň subutnamasydyr.
2013-nji ýylyň 1-nji sentýabrynda köpçülikleýin welosipedli ýörişiň geçirilmegine badalga berilmeginde, ýurdumyzda ýol hereketiniň howpsuzlygynyň biraýlygynyň yglan edilmegi Berkarar döwletimiziň bagtyýarlyk döwründe gönüden-göni hormatly Prezidentimiziň tagallasy bilen, bu ugurda anyk meýilnamalaýyn hem-de netijeli çäreleriň durmuşa geçirilýändigini alamatlandyrýar.
Hormatly Prezidentimiziň gyş gününiň säherinde paýtagtymyzdaky halkara derejeli awtomobil sport toplumyna baryp, welosipedde ýöriş etmegi we sport ulagyna çeýelik bilen erk etmegi türkmenistanlylar, esasan-da, ösüp barýan ýaş nesiller üçin görelde mekdebi bolup durýar. Munuň özi ýurdumyzda sagdyn durmuş ýörelgesiniň berkarar edilmeginiň döwlet syýasatynyň ileri tutulýan ugurlarynyň biridigine güwä geçýän anyk ýagdaýdyr.
Hormatly Prezidentmiz welosipedli ýörişini tamamlap, egindeşlerine ýurdumyzda sportuň bu meşhur görnüşleriniň işjeň ösdürilmegi ugrunda degişli düzümleriň sazlaşykly işini üpjün etmek boýunça birnäçe tabşyryklary berdi we olara işlerinde üstünlik arzuw edip, bu ýerden ugrady.