Türkmenistanyň Konstitusiýasynyň kabul edilmeginiň şu günler giňden bellenip geçilýän 20 ýyllygy mynasybetli ýurdumyzyň Merkezi banky tarapyndan gymmat bahaly metallar bolan altyndan we kümüşden ýasalan 50 we 20 manatlyk ýadygärlik şaýylyklar çykaryldy.
Şaýylyklaryň ýüz tarapynda onuň merkezinde özbaşdak Türkmenistanyň döwlet esaslarynyň, onuň asyrlardan bäri dowam edip gelýän demokratiki gözbaşlarynyň we halk häkimiýetiniň köpasyrlyk däpleriniň mizemezligini suratlandyrýan binagärlik toplumlary – Türkmensitanyň Mejlisi we Konstitusiýa binasy şekillendirilipdir. Şol ýerde ýurdumyzyň Türkmenistanyň Konstitusiýasynyň şekili ýerleşýär. Aşakda “2012” diýen ýazgy bar.
Bu şaýylyklaryň ýüz tarapynda daşyndan aýlanýan halkanyň ýokarky böleginde “Türkmenistanyň Konstitusiýasyna 20 ýyl”, aşaky böleginde “Elli manat” diýen ýazgylar şekillendirilendir. Bu iki ýazgy biri-birinden sekizburçluklar bilen aýrylandyr.
Şaýy puluň arka tarapynda, onuň merkezi böleginde Türkmenistanyň Döwlet tugrasy ýerleşdirilendir, “Türkmenistanyň Merkezi banky” diýen ýazgy we iki gapdala ýazylyp gidýän bugdaý sümmülleri şekillendirilendir.
Kümüş şaýylygy hem altyn şaýylyk ýaly ýasalandyr, ýöne arka böleginde gymmatyny beýan edýän “Ýigrimi manat” diýen ýazgy bilen tapawutlanýar.
38,61 mm diametrdäki şaýylyklar 916,7 mähekli altyndan we 925 mähekli kümüşden zikgelenendir. 50 manatlyk şaýylygyň 39,94 gram, 20 manatlyk şaýlygyň bolsa 28,28 gram agramy bar.
Şanly senäniň hormatyna çykarylan şaýylyklar milletiň Lideri hormatly Prezidentimiz Gurbanguly Berdimuhamedowyň ýolbaşçylygynda nobatdaky nyşan bolmak bilen, gürrüňsiz suratda ýurdumyzyň Merkezi bankynyň gymmatlyklarynyň arasynda berkarar döwletimiziň bagtyýarlyk döwründe mynasyp orny eýelär.
referans:www.turkmenistan.gov.tm