Galkynyş sport toplumynda stoluň üstünde oýnalýan tennisiň 2013-nji ýylda iň oňat türkmen ussatlary kesgitlendi. Olar “Top-12” jemleýji milli ýaryşyň çäklerinde güýç synanyşdylar. Bu ýaryşlar 2013-nji ýylda Türkmenistanyň çempionatynda birinjiden on ikinjä çenli orunlary eýelän erkekler we zenanlar toparlarynyň türgenleriniň köp sanlysyny ýygnady. Şeýlelikde, çempionatda medal gazanyp bilmedikler tamamlanyp barýan ýylyň soňky günlerinde onuň öwezini dolmaga oňat mümkinçilige eýe boldular.
Häzirki ýaryşyň jemlerine laýyklykda zenanlar toparynda Türkmenistanyň birnäçe gezek çempiony Enejan Ballyýewa ýeňiş gazandy. Ikinji orny Mähriban Mehtiýewa eýeledi we bürünç baýragy Ýekaterina Gromiskaýa gazandy.
Erkekleriň arasynda kiçi tennis raketkasynyň şu ýylda iň oňat ussady diýen ada Rawil Ahmedow mynasyp boldy. Hormat münberiniň ikinji ornuna Döwran Goýkaýew mündi we ýeňijileriň jemleýji üçünji ornuna Ýagmyr Taganow eýe boldy.
Indi stoluň üstünde oýnalýan tennisiň türkmen ussatlaryna indiki ýylyň fewralynda geçiriljek Türkmenistanyň çempionatyna taýýarlyk garaşýar. Onuň netijeleri dünýä çempionatyna gatnaşmak üçin ýygyndynyň düüzmini kesgitlär. Bu ýaryşlar aprelde Ýaponiýanyň paýtagty Tokioda zeminiň iň oňat türgenlerini ýygnar.
Stoluň üstünde oýnalýan tennis boýunça Türkmenistanyň iň oňat ussatlarynyň hataryna has köp ýaş türgenleriň girýändigini bellemek gerek. “Top-12” ýaryşyna gatnaşyjylaryň ýaşlary esasan 10-dan 20 ýaşa çenli aralygynda boldy. Munuň özi hormatly Prezidentimiz Gurbanguly Berdimuhamedowyň yglan eden Berkarar döwletimiziň bagtyýarlyk döwründe türkmen ýaşlarynyň hemme halkara ülňülerine gabat gelýän iň döwrebap sport toplumlarynda meşgullanmaklary üçin giň mümiknçilikleriň döredilmegi bilen düşündirlýär.
Munuň üstüne hem ýakynda Türkmenistanyň Stoluň üstünde oýnalýan tennis boýunça federasiýasy täze sport enjamyny edindi. Ol dünýä çempionatlaryny we Olimpiadany goşmak bilen has iri halkara derejesindäki ýaryşlarda ulanylýar. Sport baradaky döwlet komiteti, Stoluň üstünde oýnalýan tennis boýunça federasiýa we Aşgabadyň sport komiteti tarapyndan guralan häzirki ýaryş hem sportuň bu görnüşine eýeriji türkmenistanlylar üçin özlerini ýokary derejedäki ýaryşlara ýakyn şertlerde barlap görmäge mümkinçilik berdi.