2015-nji ýylyň 27-nji aprelinde Tbilisi ş. I.Jawahişwili adyndaky Tbilisi Döwlet uniwersitetiniň mejlisler zalynda Türkmenistanyň Bitaraplygynyň 20 ýyllygyna bagyşlanan «Bitarap Türkmenistan: parahatçylyk, howpsuzlyk we durnukly ösüş ugrundaky taryhy ädim» atly ylmy-amaly maslahat geçirildi.
Çäre I.Jawahişwili adyndaky Tbilisi Döwlet uniwersitetiniň ýolbaşçylarynyň we Gruziýanyň Daşary işler ministrliginiň ýardam bermeginde Türkmenistanyň Gruziýadaky Ilçihanasy tarapyndan gurnaldy.
Maslahat başlamazdan öň gatnaşyjylar ýörite taýýarlanan sergide Türkmenistanyň daşary syýasatyna we diplomatiýasyna, taryhyna we medeniýetine degişli kitaplar bilen tanyşdylar. Şeýle hem gatnaşyjylar üçin Türkmenistanyň gazananlary baradaky wideofilm görkezildi.
Maslahatyň işine diplomatik korpusynyň wekilleri, akademikler, I.Jawahişwili adyndaky Tbilisi Döwlet uniwersitetiniň professor-mugallymlary we talyp ýaşlary, halkara guramalaryň, Gruziýanyň Daşary işler ministrliginiň wekilleri gatnaşdylar.
Maslahat Türkmenistanyň Bitaraplygyna, parahatçylygyň, howpsuzlygyň we durnukly ösüşiniň döredilmegine gönükdirilen öňyn bitaraplygyň emele gelmeginiň taryhyna we ösüşine bagyşlandy.
Ylmy maslahatyň barşynda nutuklar we gutlag sözleri bilen I.Jawahişwili adyndaky Tbilisi Döwlet uniwersitetiniň rektory W.Papawa, Türkmenistanyň Gruziýadaky Ilçisi D.Muratow, Magtymguly adyndaky Türkmen Döwlet uniwersitetiniň prorektory G.Annaýew, D.Azady adyndaky Türkmen milli dünýä dilleri institutynyň prorektory O.Muradow, Gruziýanyň Daşary işler ministrliginiň Goňşy döwletler we sebitler müdirliginiň başlygy M.Waşakidze, Tbilisi Döwlet uniwersitetiniň Syýasy ylymlar müdirliginiň başlygy, professor M.Masaberidze dagylar çykyş etdiler.
Çäräň ahyrynda işjeň gatnaşandyklary we bu çäräni geçirmäge ýardam berendikleri üçin, Türkmenistanyň Gruziýadaky Ilçihanasynyň adyndan minnetdarlyk hormat hatlary gowşuryldy.