Türkmenistanyň demirgazygynda geljekki galla oragyna telekeçilik toparlarynyň wekilleri-de işjeň gatnaşarlar. Olaryň arasynda geçen ýyl S. Türkmenbaşy etrabynda döredilen «Alkyş alan gallaçy» daýhan hojalygy hem bar.
Oba hojalyk önümlerini şahsy öndürijä ozalky daýhan birleşiginiň 2563 gektar meýdany bölünip berildi. Onuň aglaba böleginde – 1300 gektar ýerde döwlet tabşyrygyna laýyklykda gallanyň ýokary hasyllylgy we kesellere durnuklylygy bilen tapawutlanýan «Sähraýy» sorty ýetişdirilýär. Onuň 500 ga ýerine tohumlyk galla ekildi.
Hojalyk welaýat oba hojalyk önümçilik birleşiginiň tehniki hyzmat boýunça etrap kärhanasy bilen şertnama baglaşdy, şeýle hem öz hususy traktorlaryny we ýöriteleşdirilen dürli enjamlary ulanýar. Hünärmenler her gektardan azyndan 18,3 sentner hasyl almagy göz öňünde tutýarlar.
S. Türkmenbaşy etraby demirgazyk sebitde gallany iň köp öndürýän sebitdir.Bu ýerde şu ýyl 28 müň gektar ýere bugdaý ekildi, ondan 50 müň tonnadan gowrak hasyl almak göz öňünde tutulýar. Şu etrapdan ýer alan «Ykbal açary» we «Mizemez ynam» daýhan hojalyklary hem galla ýetişdirmäge ýörüteleşýärler.
Daşoguz welaýatynyň beýleki etraplarynyň telekeçileri-de oba hojalyk önümçiliginiň bu pudagynda netijeli iş alyp barýarlar.
Batyr ÖRÄÝEW
Çeşme: turkmenistan.gov.tm