Hormatly Prezidentimiz Gurbanguly Berdimuhamedowyň tabşyrygy boýunça Türkmenistanyň Mejlisiniň Başlygy A.Nurberdiýewa Estoniýa Respublikasynyň Türkmenistandaky Adatdan daşary we Doly ygtyýarly ilçisi jenap Ýaan Heýnden ynanç hatyny kabul etdi.
Döwlet Baştutanymyzyň adyndan milli parlamentiň ýolbaşçysy myhmany ýokary diplomatik wezipä bellenmegi bilen gutlady hem-de Türkmenistanyň we Estoniýanyň arasyndaky dostlukly gatnaşyklary pugtalandyrmakda we hyzmatdaşlygy işjeňleşdirmekde üstünlikler gazanmagy arzuw etdi.
Myhman ýagşy arzuwlar üçin hoşallyk bildirip, öz gezeginde Estoniýa Respublikasynyň Türkmenistandaky ilkinji ilçisi bolup durýandygyny hem-de parahatçylyk söýüjilikli syýasaty we durmuş-ykdysady taýdan batly depginde ösüş gazanmak arzkaly halkara derejesinde uly at-abraýa ýeten döwletde öz ýurduna wekilçilik etmegini uly mertebe hasaplaýandygyny aýtdy.
Duşuşygyň barşynda diplomat ýurdumyzyň daşary we içeri syýasatynyň esasy ugurlary, döwlet Baştutanynyň başlangyjy boýunça giň gerimli özgertmeleri, şeýle hem uly möçberli halkara taslamalaryny amala aşyrmagyň barşy bilen tanyşdyryldy. Şunuň bilen baglylykda,
hormatly Prezidentimiz Gurbanguly Berdimuhamedowyň türkmenistanlylaryň maddy- hal ýagdaýynyň has-da ýokarlandyrylmagyna we olaryň ýaşaýşynyň hiliniň gowulandyrylmagyna gönükdirilen durmuş syýasatynyň ýöredilmegine aýratyn üns berildi. Muňa mysal hökmünde Mejlisiň Başlygy myhmana Türkmenistanda amala aşyrylýan döwlet durmuş-ykdysady maksatnamalar, tutuş ýurdumyz boýunça mekdepleri, çagalar baglaryny, ýokary okuw mekdeplerini, sagaldyş we lukmançylyk merkezlerini, sport desgalaryny, ähli amatlyklary bolan ýaşaýyş jaýlaryny gurmak boýunça ýaýbaňlandyrylan işler, ilat üçin ozal görlüp-eşidilmedik derejedäki ýeňillikleriň berilýändigi barada gürrüň berdi. Şeýle hem eston diplomaty türkmen parlamentiiň gurluşy we köp ugurly işi bilen tanyşdyryldy.
Eston diplomaty ikitaraplaýyn hyzmatdaşlygyň mümkinçilikler barada aýdyp, öz ýurdunyň işewür toparlarynyň Türkmenistan bilen giň möçberli gatnaşyklaryň ýola goýulmagyna gyzyklanma bildirýändigigini belledi. Jenap Ýaan Heýn şu aýda Estoniýa Respublikasynyň Premýer-ministriniň Türkmenistana boljak saparynyň barşynda şu meseleleriň jikme-jik ara alnyp maslahatlaşyljakdygyny aýtdy. Ylym we maglumatlar—aragatnaşyk tilsimatlar, saglygy goraýyş we syýahatçylyk boýunça hyzmatdaşlyk özara arkalaşykly hereket etmegiň ileri tutulýan ugurlary hökmünde görkezildi hem-de energiýanyň adaty bolmadyk çeşmelerini ulanmak boýunça tejribe alyşmagyň netijeli boljakdygy bellendi. Iki halkyň dostlukly gatnaşyklarynyň pugtalandyrylmagyna we özara duşunişmegine ýardam berýän medeni gatnaşyklary ýygjamlaşdyrmagyň mümkinçiliklerine garaldy. Şeýle hem söhbetdeşler parlamentara gatnaşyklarynyň aýratyn möhüm ähmiýetlidigini nygtadylar. Doly ygtyýarly ilçi Estoniýa Respublikasynyň parlamentinde Türkmenistan bilen dostluk toparynyň döredilendigini hem-de bu toparyň milli parlamentleriň deputatlarynyň arasynda neitijeli hyzmatdaşlygyň ýola goýulmagyna ýardam bermegi maksat edinýändigini belledi.
referans: www.turkmenistan.gov.tm