Berkarar döwletimiziň bagtyýarlyk döwründe oba hojalyk pudagynda amala aşyrylýan özgertmeleriň netijesinde öndürilýän bugdaýyň mukdarynyň artdyrylmagy bilen bagly ony daşarky bazarlara ýerlemek boýunça ýurdumyzyň mümkinçiliklerini has-da giňeltmek maksady bilen, Türkmenistanyň Prezidenti Karara gol çekdi. Resminama laýyklykda, Galla önümleri baradaky “Türkmengallaönümleri” assosiasiýasyna 2011-nji ýylyň hasylyndan öndürilen bugdaýyň ýurdumyzyň içerki sarp edijilerinden artýan möçberinden 300 müň tonnasyny Türkmenistanyň Döwlet haryt-çig mal biržasynyň üsti bilen daşarky bazarlara ýerlemäge ygtyýar berildi.
* * *
Berkarar döwletimiziň bagtyýarlyk döwründe ýurdumyzyň syýahatçylyk we sport ulgamlarynda gazanylýan üstünlikleri giňden wagyz etmek we dünýä ýaýmak, jemgyýetimizde sagdyn durmuş ýörelgelerini ornaşdyrmak, ilatymyzy köpçülikleýin bedenterbiýe we sport, syýahatçylyk bilen işjeň meşgullanmaga giňden çekmek, daşary ýurtly jahankeşdeleri Diýarymyzyň täsin we gözel tebigy künjekleri, baý taryhy-medeni mirasy bilen ýakyndan tanyşdyrmak maksady bilen, Türkmenistanyň Prezidenti Karara gol çekdi. Resminama laýyklykda, Türkmenistanyň Syýahatçylyk we sport baradaky döwlet komitetine:
“Türkmen sporty” gazetini hojalyk hasaplaşygy esasynda işleýän edara görnüşli tarap hökmünde bellenen tertipde döretmäge we ony A-3 ölçegde;
“Bedenterbiýe we sport” hem-de “Syýahat” žurnallaryny hojalyk hasaplaşygy esasynda işleýän edara görnüşli taraplar hökmünde bellenen tertipde döretmäge hem-de olary žurnal ölçeginde 2 aýda bir gezek çap etmäge;
“Syýahatçylyk we sport” ylmy-köpçülikleýin žurnalyny bellenen tertipde ýapmaga ygtyýar berildi.
Ýokarda görkezilen neşirleri 2012-nji ýylyň iýul aýyndan türkmen, iňlis we rus dillerinde çap edip başlamak bellenildi.
* * *
“Türkmenistanyň durmuş-ykdysady ösüşiniň 2011-2030-njy ýyllar üçin Milli maksatnamasynda” ýurdumyzyň nebitgaz pudagynyň öňünde goýlan wezipeleri üstünlikli durmuşa geçirmek, şeýle hem “Türkmennebit” döwlet konserniniň işini has-da kämilleşdirmek maksady bilen, Türkmenistanyň Prezidenti Karara gol çekdi. Resminama bilen, “Türkmennebit” döwlet konserni hakyndaky Düzgünnama tassyklanyldy.
* * *
Daşky gurşawy goramak boýunça döwlet syýasatynyň hukuk esaslaryny pugtalandyrmak, howanyň üýtgemeginiň öňüni almak we onuň täsirini azaltmak boýunça işleriň esasy ugurlaryny kesgitlemek, şeýle hem howanyň üýtgemeginiň meseleleri boýunça Türkmenistanyň gatnaşýan halkara-hukuk resminamalarynyň ýerine ýetirilmegini üpjün etmek maksady bilen, Türkmenistanyň Prezidenti Karara gol çekdi. Resminama bilen, Howanyň üýtgemegi boýunça Türkmenistanyň Milli strategiýasy tassyklanyldy.
referans: www.turkmenistan.gov.tm