Türkmenistanyň Prezidenti Gurbanguly Berdimuhamedow ýurdumyza gelen Aziýanyň Olimpiýa Geňeşiniň (AOG) prezidenti şeýh Ahmad Al-Fahad Al-Sabahy kabul etdi.
Duşuşygyň barşynda myhman AOG-niň özüniň oňyn syýasaty hem-de döredijilikli başlangyçlary bilen bütin dünýäde meşhur bolan Türkmenistan bilen netijeli hyzmatdaşlygy, şol sanda sporty giňden wagyz etmek we ösdürmek ulgamynda hyzmatdaşlygy pugtalandyrmaga uly gyzyklanma bildirýändigini nygtady. Soňky ýyllarda bu netijeli gatnaşyklar täze many-mazmun bilen baýlaşdyryldy. Aziýanyň Olimpiýa Geňeşiniň 2017-nji ýylda Aşgabatda Ýapyk binalarda we söweş sungaty boýunça V Aziýa oýunlaryny geçirmek baradaky çözgüdi hem muňa şaýatlyk edýär.
Hormatly Prezidentimiz Gurbanguly Berdimuhamedow Türkmenistan bilen AOG-niň arasyndaky hyzmatdaşlygyň okgunly häsiýete eýedigini belledi we ýurdumyzyň mundan beýläk hem däbe öwrülen gatnaşyklary işjeň ösdürmäge meýillidigini tassyklady. Döwlet Baştutanymyzyň nygtaýşy ýaly, Olimpiýa hereketiniň belent ynsanperwerlik ýörelgelerine ygrarly bolan Bitarap Türkmenistan sport ulgamynda sebit we halkara hyzmatdaşlygyny ösdürmek ugrunda çykyş edýär hem-de bu babatda anyk ädimleri ädýär.
Duşuşygyň barşynda hormatly Prezidentimiz we Aziýanyň Olimpiýa Geňeşiniň ýolbaşçysy ikitaraplaýyn gatnaşyklaryň ileri tutulýan ugurlary barada pikir alşyp, ony mundan beýläk-de işjeňleşdirmek üçin giň mümkinçilikleriň bardygyny bellediler. Aziada-2017-ä taýýarlyk görmek söhbetdeşligiň esasy meselesi boldy. Aziadanyň ýaryşlary türkmen paýtagtynda gurulýan Olimpiýa şäherjiginiň sport meýdançalarynda geçiriler. Mälim bolşy ýaly, bu köpugurly toplumyň sport we beýleki degişli düzümiň desgalarynyň gurluşygy üç tapgyrda amala aşyrylýar. Häzirki wagtda birinji we ikinji tapgyrlaryň çäklerinde işler tamamlandy hem-de üçünji tapgyryň gurluşyk işleri güýçli depginde alnyp barylýar.
Şunuň bilen baglylykda, Aziýanyň Olimpiýa Geňeşiniň ýolbaşçysy Oýunlara taýýarlyk görmek meselelerine yzygiderli üns we ýakyndan goldaw berýändigi üçin döwlet Baştutanymyza tüýs ýürekden hoşallyk bildirdi. Myhman şeýle hem bu ugurda Türkmenistanda amala aşyrylýan işlere ýokary baha berdi. Şunda hormatly Prezidentimiz Gurbanguly Berdimuhamedowyň ýolbaşçylygynda ýurdumyzyň köpçülikleýin bedenterbiýe-sagaldyş hereketini we sporty ösdürmek, döwrebap sport düzümini döretmek, ýaş nesli beden taýdan sagdyn hem-de bilimli adamlar edip ýetişdirmek işinde haýran galdyyjy üstünliklere eýe bolandygy bellenildi. Milli Liderimiziň bu ulgamda başyny başlan öňdengörüjilikli syýasaty aýdyň netijeleri berýär –türkmen sporty hil taýdan täze derejä çykýar, Türkmenistan iri sport ýaryşlarynyň geçirilýän ýerine öwrülýär. Munuň özi hem ýurdumyzyň halkara abraýynyň barha artýandygyna şaýatlyk edýär.
Hormatly Prezidentimiz Gurbanguly Berdimuhamedow mähirli sözler üçin minnetdarlyk bildirip, ýurdumyzyň Aziada-2017-ä aýratyn ähmiýet berýändigini hem-de oňa taýýarlyk görmek işlerine örän jogapkärli çemeleşýändigini belledi. Milli Liderimiziň nygtaýşy ýaly, Türkmenistan indiki ýyl bu abraýly ýaryşlary mynasyp garşylamak hem-de ýokary guramaçylyk derejesinde geçirmek üçin ähli tagallalary eder. Şu maksat bilen, ýurdumyzda giň möçberli we köpugurly işler ýaýbaňlandyryldy. Bu işlere daşary ýurtly hyzmatdaşlar çekilýär, öňdebaryjy halkara tejribesi öwrenilýär. Şunuň bilen baglylykda, Aziýa oýunlarynyň taryhynda ilkinji gezek Aziada-2017-ä Okeaniýa ýurtlarynyň hem türgenleriniň gatnaşýandygyny bellemek gerek. Aziadanyň maksatnamasyna laýyklykda, sportuň 21 görnüşi boýunça ýaryşlar geçiriler.
Türkmenistan bedenterbiýäni hem-de sporty ösdürmegi we höweslendirmegi döwlet syýasatynyň ileri tutulýan ugurlarynyň biri hökmünde kesgitläp, jemgyýetde sagdyn durmuş ýörelgesini berkarar etmek, ilaty, ilkinji nobatda bolsa ýaşlary sportuň dürli görnüşleri bilen yzygiderli meşgullanmaga çekmek, ýokary derejeli türgenleri taýýarlamak boýunça netijeli işleri geçirýär. Ýurdumyzda her ýyl “Sagdynlyk we bagtyýarlyk” şygary bilen köpçülikleýin bedenterbiýe-sport we medeni-sagaldyş çäreleriniň biraýlygynyň geirilmegi hem munuň aýdyň subutnamasydyr. Şu ýyl bu biraýlygyň tamamlanýan gününde, ýagny, 5-nji maýda –Aziýada 2017-niň başlanmagyna 500 gün galanda, sagat 17-de döwlet Baştutanymyzyň başlangyjynda oýunlaryň alawy bilen atly ýöriş badalga alar. Bu ýörişiň ugry Türkmenistanyň 5 welaýatynyň ählisiniň çäginden geçer.
Ozal habar berlişi ýaly, bu atly ýörişe her welaýatda ajaýyp ahalteke bedewlerine atlanan çapyksuwarlaryň 17-si gatnaşar. Oýunlaryň alawy ýurdumyzyň ähli welaýatlaryna Aziýa oýunlarynyň nuruny çaýyp, 2017-nji ýylyň 17-nji sentýabrynda türkmen paýtagtyndaky Olimpiýa stadionyna getiriler we şol ýerde Aziadanyň alawy ýakylar. Şeýlelikde, türkmen halkynyň milli gymmatlygy hem-de buýsanjy bolan meşhur ganatly bedewler Ýapyk binalarda we söweş sungaty boýunça V Aziýa oýunlarynyň özboluşly nyşanyna öwrüler.
Şunuň bilen baglylykda, Aziýanyň Olimpiýa Geňeşiniň ýolbaşçysy hormatly Prezidentimiz Gurbanguly Berdimuhamedowyň Aziada-2017-ä degişli meseleleri çözmäge tutanýerli çemeleşýändigi aýratyn belläp, Türkmenistanyň Baştutanynyň öňe sürýän ähli teklipleriniň Olimpiýa hereketiniň ruhuna laýyk gelýändigini nygtady. Myhman bular barada aýtmak bilen, milli Liderimiziň Oýunlara taýýarlyk görmegiň, guramagyň hem-de onuň nyşanlarynyň dürli meseleleri, şol sanda atly ýöriş, Aziada-2017-niň açylyş dabarasy babatdaky pikirlerini makullady. Atly ýöriş ýurdumyzyň ähli welaýatlarynyň çäginden geçip, Aşgabatda tamamlanar. Bularyň ählisi türkmenistanlylara V Aziýa oýunlary ýaly şeýle ajaýyp waka özleriniň hem dahyllydygyny duýmaga mümkinçilik berer hem-de Aşgabatda geçiriljek Oýunlaryň has gyzykly we köp öwüşginli bolmagyna ýardam eder.
AOG-niň ýolbaşçysy netijeli we çuň manyly söhbetdeşlik üçin hormatly Prezidentimiz Gurbanguly Berdimuhamedowa hoşallyk sözlerini aýdyp, Aziýanyň we Okeaniýa ýurtlarynyň sport guramalarynyň adyndan milli Liderimize berk jan saglyk hem-de alyp barýan ägirt uly işlerinde täze üstünlikler, Türkmenistana hem-de ähli türkmen halkyna abadançylyk we gülläp ösüş arzuw etdi. Pursatdan peýdalanyp, myhman döwlet Baştutanymyzy hem-de türkmenistanlylaryň ählisini ýetip gelýän Halkara Nowruz baýramy bilen tüýs ýürekden gutlady.
Duşuşygyň ahyrynda hormatly Prezidentimiz Gurbanguly Berdimuhamedow we AOG-niň prezidenti şeýh Ahmad Al-Fahad Al-Sabah ýurdumyzyň hem-de Aziýanyň Olimpiýa Geňeşiniň arasyndaky däp bolan hyzmatdaşlygyň üstünlikli dowam etdiriljekdigine ynam bildirdiler. Şol hyzmatdaşlyk bolsa halkara Olimpiýa hereketiniň döredijilikli maksatlaryna laýyk gelýär. Bu hereket ählumumy parahatçylygy, döwletleriň we halklaryň arasyndaky dostluk gatnaşyklaryny hem-de netijeli hyzmatdaşlygy pugtalandyrmagyň möhüm şerti bolup durýar.
öňki habar
soňky habar