Ýurdumyzyň demirgazyk welaýatynda tarp ýerli Ruhubelent etrabynyň “Tüniderýa” we S.Türkmenbaşy adyndaky etrabyň “Bitaraplyk” geňeşliklerinde arassa agyz suwuny öndürýän täze kärhanalaryň ulanmaga berilmegi bilen baýramçylygyň öň ýanyndaky açylyş dabaralary dowam etdirildi.
Şunuň ýaly desgalaryň gurulmagy, esasanam alyslarda ýerleşýän tarp ýerli hojalyklarda bina edilmegi milletiň Lideriniň başlangyjy bilen kabul edilen “Türkmenistanyň ilatly ýerlerini arassa agyz suwy bilen üpjün etmegiň Baş maksatnamasynyň” çäklerinde alnyp barylýar. Ýurdumyzyň “Döwür gurluşyk” hususy kärhanasynyň işgärleri tarapyndan Ruhubelent etrabynda gurlan bir gije-gündizde 150 kub metr arassa agyz suwuny öndürmäge niýetlenen bu desga diňe bir etrap merkeziniň ilatyny däl-de, eýsem onuň töweregindäki ilatly ýerleri arassa suw bilen üpjün etmäge mümkinçilik berer.
Bir gektar meýdanda ýerleşýän täze kärhana dürli maksatly desgalaryň toplumyndan ybaratdyr. Onuň düzüminde ibermäge taýýar edilen suw saklaýan gaplar, sorujy beket, suwuň hiline gözegçilik edýän gullugyň jaýy, barlaghana bar. Iň häzirki zaman talaplara laýyk gelýän önümçilik tehnologiýasynyň üznüksiz hereketini üpjün etmek Russiýada, Germaniýada we Daniýada öndürilen döwrebap enjamlar arkaly amala aşyrylýar. Täze binanyň daş-töweregi abadanlaşdyrylyp, bagy-bossanlyga öwrülendir.
S.Türkmenbaşy adyndaky etrabyň uzakda ýerleşýän hojalyklarynyň biri bolan “Bitaraplyk” geňeşliginiň “Ak ýaýla” daýhan birleşiginde gurlan ýene-de bir suw arassalaýjy desga hem häzirki zaman talaplaryna gabat gelýär. Onuň kuwwaty bir gije-gündizde arassalanan we agyz suwunyň standartlarynyň talaplaryna gabat gelýän suwuň 100 kub metrine deňdir. Häzirki zaman tehnologiýalary we ýokary öndürijilikli enjamlaryň esasynda işlejek täze kärhana “Zerli dag” hususy kärhanasynyň işçileri tarapyndan guruldy.
Welaýat we etrap häkimlikleriniň, jemgyýetçilik guramalarynyň wekilleriniň, hormatly ýaşulularyň we ýaşlaryň gatnaşmagynda geçirilen desgalaryň açylyş dabaralary aýdyň öwüşginli baýramçylyga öwrüldi. Hormatly Prezidentimiz Gurbanguly Berdimuhamedowyň durmuş ugurly syýasaty netijesinde halkyň durmuş derejesini gyşarnyksyz ýokarlandyrmaga gönükdirilen toplumlaýyn maksatnamalaryň üstünlikli amala aşyrylýan berkarar döwletimiziň bagtyýarlyk döwrüni wasp edýän aýdymlar ýaňlandy. Dabarada aýratyn tapawutlanan gurluşykçylara gymmat bahaly sowgatlar gowşuryldy.
referans: www.turkmenistan.gov.tm