Aşgabatda ýaşlaryň arasynda agyr atletika boýunça açyk birinjilik geçirildi. Bu ýaryşa hünärmenler bilen bir hatarda sportuň bu görnüşi boýunça Türkmenistanyň ýygyndy toparynyň bäş tälimçisi Ikram Matkarimow hem gatnaşdy.
– Häzirki wagtda milli ýygyndynyň agzalarynyň ählisi diýen ýaly öň ýaşlar derejesinde ýaryşlary geçdiler diýip, I.Matkarimow gürrüň berýär. Biz ýaş türgenleri olaryň özlerini ýitirmezlikleri we öz başarnyklaryny ýerlikli ulanmaklary üçin olara gözegçilik edýäris. Olaryň arasyndan biz 15 ýaşly sport ussatlygyna dalaşgär Wladislaw Aşyrowy, 2003-nji ýylda doglan Begmyrat Baýjanowy, 2001-nji ýylda doglan Reýinbaý Jumaýewi göz astyna alýarys. Olar ýaşlaryň arasynda türkmenistanyň çempionlarydyr. Şonuň üçin hem biz 16 kg-dan18 kg çenli we 20 kg çenli agram derejelerde ýaryşlary yzygiderli geçirip durýarys. Bu ýaryşlaryň ýeňijileri halkara ýaryşlary üçin ýygyndy toparyň düzümini düzýär. Şeýle hem bu türgenler 2017-nji ýylda Aşgabatda ýapyk binalarda we söweş sungaty boýunça geçiriljek V Aziýa oýunlarynda biziň ýurdumyzyň abraýyny gorap çykyş ederler.
Türkmenistanyň ähli sebitlerinde örän güýçli mekdepler bar. Olarda atletikaçylaryň türgenleşmekleri üçin ähli şertler döredilendir. Mary welaýatynda Guwanç Gandymow we Şamsutdin Tursunmagomedow, Daşoguzda Sänjar Kadyrbergenow, Lebap welaýatynda Ihtiýar Jafarow ýaly ussat hünärmenleriň zähmet çekýän ýerleri bolan merkezler işleýärler.
Welaýatlarda agyr atletikaçylaryň taýýarlanyş derejesi hem paýtagtdakydan pes däldir. Biziň türgenlerimiziň köpüsi sebitlerde tälim alan türgenlerdir. Meselem, halkara derejeli sport ussady, 23 ýaşly Hojamuhammet Toýçyýaw Mary welaýatyndandyr. Häzirki wagtda ol milli ýygyndynyň iň öňdebaryjylarynyň biridir, Türkmenistanyň çempiony we rekordsmeni.
Häzirki wagtda Türkmenistanyň milli ýygyndysy Aziýa çempionatyna taýýarlyk görýär, güýzde bolsa biziň ýygyndymyz 2018-nji ýyldaky Olimpiýa oýunlaryna ýollanma almak üçin reýting ball üçin Hýustonda geçiriljek dünýä çempionatyna gatnaşar.