Woleýbol boýunça ýokary liganyň erkekler toparlynyň arasynda Türkmenabat şäheriniň 3-nji sport mekdebiniň binýadynda geçirilen Türkmenistanyň çempionatynyň ikinji tapgyrynyň duşuşyklarynyň netijesinde öňdäki dört topar kesgitlenildi. Hünärmenleriň çaklamalaryna görä, indi geçiriljek iki tapgyryň dowamynda altyn medal ugrundaky bäsleşikler çekeleşikli häsiýete eýe bolar.
Öňe saýlanan dörtlügiň araynda birinji orun ugrunda Aşgabat şäheriniň toparlarynyň 3-si Döwlet migrasiýa gullugynyň (ýurdumyzyň häzirki çempiony) topary, Milli sport we syýahatçylyk institutynyň “Talyp sporty” we Içeri işler ministrliginiň “Galkan” , şeýle hem Döwlet serhet gullugynyň Mary şäherindäki “Serhetçi” toparlary bar.
Ýaryşlara şeýle hem Mary welaýatyndan “Marygaz” we “Marguş” toparlary, Goranmak minstrliginiň “Watançy”, Türkmen döwlet binagärlik-gurluşyk institutynyň “Binagär”, “Lebap” we “Daşoguz” toparlary gatnaşýarlar. Toparlaryň arasyndaky Türkmenistanyň çempionatynyň her tapgyry ýurdumyzyň dürli şäherlerinde nobatma-nobat geçirilýär. Bu ýaryşlar şu ýylyň başynda Aşgabatda badalga aldy we Türkmenabat şäherinde dowam etdirildi, üçünji tapgyr aprel aýynda Daşoguz şäherinde, dördünji tapgyr bolsa maý aýynda Mary şäherinde geçiriler.
Döwlet migrasiýa gullugynyň topary bilen “Talyp sportynyň” arasyndaky geçirilen oýun uly gyzyklanma döretdi. Migrasiýa gullugynyň woleýbolçylary bu duşuşykdan ozal talyp türgenlerden 4 utuk öňde barýardylar we bu duşuşygyň netijesine garamazdan, indiki tapgyr başlanýança birinji orny saklap galýardylar.
Öňde barýan toparyň artykmaçlygyny azaltmak üçin “Talyp sportuna” ýeňiş gazanmak örän zerurdy. Şonuň üçin hem bu duşuşyk örän çekeleşikli we gyzykly ýagdaýda geçdi. Oýnuň 2,5 sagatlap dowam etmegi hem muňa şaýatlyk edýär.
Duşuşygyň birinji döwri migrasiýa gullugynyň toparynyň peýdasyna 28:26 hasabynda tamamlandy. Emma ikinji döwürde “Talyp sporty” topary erjellik görkezip, Türkmenistanyň geçen ýylky çempionyny 25:23 hasabynda utmagy başardy we umumy hasap 1:1 boldy.
Üçünji döwrüň başynda hem talyp türgenler 6 utuk bilen öňe saýlanyp, ýeňiş gazanmak üçin uly mümkinçilige eýe boldular. Emma çempionlar ýene-de ussatlygyny görkezip, üçünji döwri 25:19 hasabynda öz peýdasyna tamamlamagy başardylar.
Dördünji döwürde “Talyp sporty” ähli güýji bilen hüjüme geçdi. Bu öz oňat netijesini hem berdi. Beýle ýagdaýa garaşmadyk çempionlar 17:25 hasabynda ýeňlişe sezewar boldular.
15 utuga çenli dowam etdirilýän iň soňky bäşinji döwürde 2013-nji ýylda Türkmenistanyň çempionlary näçe dyrjaşsalar-da, talyp türgenleriň okgunly hüjümine böwet bolup bilmediler we 15:12 hasabynda “Talyp sporty” ýeňiş gazandy. Umumy hasap 3:2.
Woleýbol boýunça ýaryşlary geçirmegiň düzgünlerine laýyklykda, eger duşuşyk 3:2 hasabynda tamamlansa, ýeňijä iki utuk, utulana bolsa bir utuk berilýär. Şeýlelikde, Döwlet migrasiýa gullugynyň topary iki tapgyrdan soň 23 utuk bilen birinji orunda, “Talyp sporty” bolsa 20 utuk toplap, ikinji orunda barýar.
Her biri 19 utuk toplan “Serhetçi” we “Galkan” toparlary üçünji we dördünji orunlary paýlaşýarlar. “Binagär” topary 14 utuk bilen bäşinji orny eýeleýär. Beýleki toparlaryň her biriniň toplan utuklary 10-a hem ýetmeýär.
